حیدرآباد۔تلنگانہ میں برڈ فلو پہنچ گیا ہے! ریاست تلنگانہ کے کئی اضلاع میں دوبارہ پرندوں کے فوت ہونے کے واقعات پیش آنے لگے ہیں اور شہر حیدرآباد کو جن علاقوں سے چکن پہنچتا ہے ان علاقو ںمیں بھی بڑی تعداد میں پرندوں کے فوت ہونے کی شکایات موصول ہونے لگی ہیں۔ ریاست کے اضلاع ظہیر آباد‘ وقارآباد ‘ کے علاوہ نظام آباد اور دیگر علاقوں سے پرندوں کی اموات کی خبریں موصول ہونے لگی ہیں اور وقارآباد کے علاقوں میں ہوا میں اڑتے ہوئے کوے اچانک گر کر فوت ہونے لگے ہیں اور یہ صورتحال وقارآباد کے عوام کے لئے تشویش کا باعث بنتی جا رہی ہے۔پرگی اور دیگر علاقوں میں موجود چکن کے فارم جہاں مرغیوں کو پالا جاتا ہے ان میں ہزاروں کی تعداد میں مرغیوں کی اموات واقع ہونے لگی ہیں اور کئی پرندوں میں بیماریاں دیکھی جا رہی ہیں لیکن ماہر مویشیاں کی جانب سے اس بیماری کی توثیق نہیں ہورہی ہے اور کہا جا رہاہے کہ یہ بیماری پرندو ںکو متاثر کر رہی ہے جس کی وجہ سے وہ فوت ہونے لگے ہیں۔ریاست تلنگانہ میں ملک بھر میں برڈ فلو کے وباء کے ساتھ ہی کئی علاقو ںمیں مرغیوں کی اموات کی اطلاعات موصول ہوئی اور کئی مقامات پر مرغیوں کو پالنے والو ںکی جانب سے مردار مرغیوں کو پھینکا گیا تھا اور جن اضلاع میں چکن کے فوت ہونے کی شکایات موصول ہوئی تھیں ان اضلاع کے اعلیٰ عہدیداروں نے برڈ فلو کی تردید کرتے ہوئے کہا تھا کہ چکن میں برڈ فلو نہیں پایاگیا ہے لیکن اس کے باوجودمرغیوں کی اموات کا سلسلہ جاری ہے جو کہ عہدیدارو ںکو بھی متفکر کئے ہوئے تھا لیکن دو تا تین ہفتہ کے دوران چکن کی اموات کی اطلاع موصول نہیں ہوئی مگر اب گذشتہ تین یوم سے مسلسل ریاست کے کئی اضلاع بالخصوص کریم نگر ‘ وقارآباد‘ ظہیر آباد اور نظام آباد کے علاوہ اطراف و اکناف کے علاقوں میں چکن کی اموات کی اطلاعات کے بعد تاجرین چکن کی جانب سے بھی اس بات کی توثیق کی جانے لگی ہے کہ چکن میں کوئی ایسی بیماری پائی جا رہی ہے جس کی وجہ سے مرغیاں فوت ہونے لگی ہیں۔بتایاجاتا ہے کہ ریاست تلنگانہ میں چکن کے تاجرین بالخصوص ہائچریز چلانے والے طبقہ کی جانب سے ان خبروں کو پوشیدہ رکھنے کی کوشش کی جار ہی ہے لیکن اب وقارآباد میں فضاء میں اڑنے والے پرندو کے گرنے کے واقعات اور اموات نے نہ صرف شہریوں بلکہ ان تاجرین کو بھی متفکر کردیا ہے اور وہ اب ان اطلاعات کو پوشیدہ رکھنے کے بجائے ان حالات سے عہدیداروں کو واقف کروانے لگے ہیں۔چکن کے تاجرین نے بتایا کہ ریاست تلنگانہ میں چکن کی اموات کی اطلاعات کے ساتھ ہی دوبارہ چکن کی مارکٹ پر شدید اثر دیکھا جانے لگا ہے اور کہا جار ہاہے کہ شہریوں میں برڈ فلو سے زیادہ نئی بیماری کے تعلق سے خوف پیدا ہونے لگا ہے اور جب عہدیدار ہی اس بات سے واقف نہیں ہیں کہ پرندے کس بیماری سے فوت ہورہے ہیں تو ایسے میں عوام کو مطمئن کرنا بے انتہاء مشکل ہونے لگا ہے اور شہریوں کی جانب سے استفسار کیا جانے لگا ہے کہ آیااس بات کی کوئی ضمانت ہے کہ پرندوں میں پائی جانے والی یہ بیماری برڈ فلو کے طرز پر انسان کو متاثر نہیں کرسکتی !
