ریاست بھر میں 52.43 لاکھ ووٹرس، 20 جنوری کو نوٹیفکیشن جاری ہونے کا امکان
حیدرآباد۔ 13 جنوری (سیاست نیوز) تلنگانہ ریاستی الیکشن کمیشن نے ریاست میں آئندہ اربن لوکل باڈی (یو ایل بی) انتخابات کی تیاریاں تیز کردی ہیں۔ اس سلسلے میں 2026 کے بلدیاتی انتخابات کے لئے ووٹرس کی حتمی فہرست باضابطہ طور پر جاری کردی گئی ہے۔ ریاست کی اہم بلدیات اور میونسپل کارپوریشنس میں ووٹر رجسٹریشن کا عمل پہلے ہی مکمل ہوچکا ہے۔ الیکشن کمیشن کے مطابق بلدیات اور کارپوریشنس میں مجموعی طور پر 52,43,023 ووٹرس درج ہیں انمیں 25,62,639 مرد اور 26,80,014 خواتین اور 640 خواجہ سرا ووٹرس شامل ہیں۔ کئی شہروں میںخاتون ووٹرس کی تعداد مردوں سے زیادہ ہونے کو ایک اہم رجحان قرار دیا جارہا ہے۔ الیکشن کمیشن کے جاری کردہ اعداد و شمار کے مطابق نظام آباد میونسپل کارپوریشن کے 60 وارڈس میں ووٹرس کی تعداد 3,48,051 ہیں جو ریاست میں سب سے زیادہ ہیں۔ اس کے بعد کریم نگر میونسپل کارپوریشن کے 66 وارڈس میں 3,40,580 ووٹرس درج ہیں جن میں 1,69,679 مرد اور 1,70,858 خواتین شامل ہیں۔ سب سے کم ووٹرس کتہ گوڑم میونسپل کارپوریشن میں ہیں جہاں ووٹرس کی جملہ تعداد 1,34,775 ہے۔ میونسپلٹیز کی فہرست میں سوریاپیٹ میونسپلٹی 1,08,848 ووٹرس کے ساتھ سرفہرست ہے جہاں 56,664 خواتین شامل ہیں۔ سب سے کم ووٹرس امراخیتسا میونسپلٹی میں ہیں جہاں 9,147 بتائی گئی ہے۔ ریاستی الیکشن کمیشن نے ووٹر لسٹ کی تیاری کا شیڈول پہلے ہی جاری کردیا تھا۔ آج فائینل ووٹر لسٹ کی اجرائی کے بعد 20 جنوری کو انتخابی شیڈول جاری ہونے کا امکان ہے جبکہ چیف منسٹر ریونت ریڈی اور دوسری جماعتوں کے اہم قائدین 16 جنوری سے انتخابی مہم کا آغاز کریں گے۔ عہدیداروں نے بتایا کہ اسی ووٹر لسٹ کی بنیاد پر وارڈس تحفظات کو حتمی شکل دینے کا عمل شروع کیا جائے گا۔ ووٹرس کو مشورہ دیا گیا ہے کہ وہ الیکشن کمیشن کی ویب سائٹ پر اپنے نام ضرور چیک کریں۔ 2