حیدرآباد 4 اپریل (یواین آئی) تلنگانہ میں لاک ڈاون پر عمل جاری ہے تاہم شام 6بجتے ہی پولیس کی جانب سے دکانات کو بند کروایاجارہا ہے اور دن کے اوقات میں دکانات پر ضروری اشیا کی خریداری کے موقع پر سماجی فاصلہ کی برقراری کویقینی بنانے کی ہدایت دی جارہی ہے ۔اس لاک ڈاون کے نتیجہ میں آٹو ڈرائیورس،کیاب ڈرائیورس، یومیہ اجرت پر کام کرنے والے افراد اور پھیری والے بھی شدیدمتاثر ہوئے ہیں۔ان کا ماننا ہے کہ حکومت کے لاک ڈاون کے نتیجہ میں ان کی روزی روٹی متاثر ہوئی ہے ۔دوسری طرف بعض تنظیموں اور نوجوانوں کی جانب سے پریشان حال افراد،غریبوں اور بے سہارا لوگوں کے ساتھ ساتھ سڑکوں پر اپنی زندگی گذارنے والوں کے لئے کھانے کا اپنے طور پر انتظام کیاجارہا ہے ۔لاک ڈاون کے نتیجہ میں ضروری اشیا بھی کافی مہنگی ہوگئی ہیں۔ گھریلو سامان کی قیمتیں آسمان کو چھورہی ہیں تو سگریٹس اور پان کے ساتھ گٹھکا کھانے والوں کو شدیدمشکلات کا سامنا ہے کیونکہ لاک ڈاون کے دوران یہ دکانات بھی بند ہیں۔بعض مقامات پر یہ سامان کافی مہنگے داموں میں مل رہا ہے ۔ کئی مصروف ترین علاقے سنسان ہوگئے ہیں۔ صبح 6 تا شام 6بجے تک صرف ضروری اشیا کی دکانات کو ہی کھلارکھنے کے احکام جاری کئے گئے ہیں۔دکانات میں ضروری اشیاکی خریداری کے لئے لوگوں کا ہجوم دیکھاجارہا ہے ۔
