حیدرآباد یکم اپریل(یواین آئی) تلنگانہ میں شدید گرمی سے راحت کے کوئی آثار نظر نہیں آرہے ہیں کیونکہ درجہ حرارت میں روز بروز اضافہ ہوتا جارہا ہے ۔دونوں ریاستوں کے اضلاع و مختلف مقامات پر شدید گرمی دیکھی جارہی ہے ۔محکمہ موسمیات نے پیش قیاسی کی کہ گرمی کی لہر آئندہ 2تا 3دن برقرار رہے گی۔محکمہ موسمیات نے بعض اضلاع کیلئے ایلوالرٹ جاری کردیا ہے ۔عادل آباد،آصف آباد،منچریال،نرمل، نظام آباد، جگتیال، سرسلہ، کریم نگر، پداپلی، بھوپال پلی،مُلگ میں شدت کی گرمی محسوس کی جارہی ہے ۔دن کے ساتھ رات کے درجہ حرارت میں بھی اضافہ ہوا ہے ۔ حیدرآباد میں درجہ حرارت تقریبا 38ڈگری درج کیاگیا ۔اسی دوران گرمی سے بچنے لوگ مختلف تدابیر اختیار کررہے ہیں۔دوپہر کے وقت سڑکوں پر ٹریفک میں کمی دیکھی جارہی ہے ۔واٹر کولرس، ایر کولرس کے علاوہ ٹھنڈی مشروبات کی فروخت میں بھی اضافہ ہوا ہے ۔ڈاکٹرس نے چھوٹے بچوں اور ضعیف افراد کو مشورہ دیا کہ وہ گھروں میں ہی رہیں۔عوام کا کہنا ہے کہ گذشتہ برسوں کے مقابلے اس مرتبہ گرمی کافی ہے ۔صبح 9بجے سے ہی شدید گرمی کا آغاز ہورہا ہے جو دوپہر میں اپنے عروج پر دیکھی جارہی ہے ۔ ٹھنڈے مشروبات کے ساتھ او آر ایس کی پیکٹس ومشروبات کی فروخت بھی بڑھ گئی ہے ۔
