حکومتوں سے بھر پور امداد ، بنیادی سہولتوں کی فراہمی ، سماجی فاصلہ پر عمل
حیدرآباد۔ 10اپریل(سیاست نیوز) ریاست تلنگانہ و آندھراپردیش میں حکومتوں کی جانب سے بیرون ریاست مزدوروں کی نگہداشت اور ان کے لئے سہولتوں کی فراہمی کے سلسلہ میں اقدامات کئے جا رہے ہیں اور ان مزدوروں کو ممکنہ سہولتوں اور غذائی سہولتوں کے علاوہ طبی سہولتوں کی فراہمی کے اقدامات کئے جانے لگے ہیں۔ ریاست تلنگانہ میں موجود 3.35لاکھ بیرون ریاست سے تعلق رکھنے والے مزدوروں میں مجلس بلدیہ عظیم تر حیدرآباد کے حدود میں 85ہزار 527 مزدور موجود ہیں اور ان مزدوروں کو ریاستی حکومت کی جانب سے 12کیلو چاول اور 500 روپئے نقد جاری کرنے کے فیصلہ کے ساتھ چیف منسٹر تلنگانہ مسٹر کے چندر شیکھر راؤ نے اعلان کیا کہ ریاستی حکومت نہیں چاہتی کہ ایک بھی مزدور بھوکا پیٹ سوئے اور حکومت تلنگانہ ملک کی دیگر ریاستوں سے تعلق رکھنے والے ان مزدوروں کوریاست کی ترقی کے شراکت دار تصور کرتی ہے اور ان کے ساتھ کوئی سوتیلا سلوک نہیں کیا جائے گا بلکہ انہیں اس بات کی ہدایت دی گئی ہے کہ وہ جہاں ہیں وہاں رہیں ریاستی حکومت کی جانب سے ان کی ممکنہ مدد کی جائے گی۔ ریاستی وزیر مسٹر ٹی ہریش راؤ نے مزدوروں کو اپنی گاڑی میں ان کے مقام تک چھوڑنے اور ان سے گفتگو کرتے ہوئے ان کی حوصلہ افزائی کی اور کانگریس رکن اسمبلی مسٹر ٹی جگا ریڈی نے بھی مزدوروں کو پیدل سفر کرتے ہوئے دیکھ انہیں سہولت فراہم کرنے کے اقدامات کئے ۔ ریاست تلنگانہ میں سیاسی اختلافات سے بالاتر تمام سیاسی جماعتو ںکے قائدین کی جانب سے مزدوروں کی مدد کی جا رہی ہے اورشہریوں کی جانب سے اس بات کی کوشش کی جا رہی ہے کہ جتنا ہوسکے ان کی مدد کی جائے ۔اسی طرح آندھرا پردیش میں 33ہزار845 مزدور ہیں جن کا تعلق ملک کی دیگر ریاستوں سے ہے اور ریاستی حکومت کی جانب سے آندھرا پردیش میں ان کیلئے 393 مزدوروں کے کیمپ بنائے گئے ہیں جہاں حکومت کی جانب سے طبی سہولتوں کی فراہمی کے علاوہ انہیں ٹیلی ویژن کی سہولت‘ غذائی سہولت کے علاوہ طبی سہولتوں کی فراہمی عمل میں لائی جا رہی ہے ۔ضلع کرشنا 7051 مزدوروں کے لئے مراکز قائم کئے ہیں اور ان مراکز میں سماجی فاصلہ کے اصولوں کے ساتھ بنیادی سہولتوں کی فراہمی عمل میں لائی جا رہی ہے۔چیف منسٹر مسٹر جگن موہن ریڈی نے حکومت کی جانب سے ان مراکز میں غذاء اور طبی سہولتوں کی فراہمی کے اقدامات کے علاوہ دیگر سہولتوں کی فراہمی کی ہدایت دی ہے اور ریاست میں خدمات انجام دے رہی غیر سرکاری تنظیموں کے تعاون سے حکومت ان کیمپوں میں قیام کرنے والے مزدوروں کیلئے 2جوڑی کپڑے ‘ بلانکٹ‘ ٹوتھ برش‘ ٹوتھ پیسٹ‘ صابن وغیرہ کا انتظام کیاجارہا ہے ۔ تلنگانہ میں موجود بیشتر مزدوروں کا تعلق ریاست بہار‘ مہاراشٹر‘ چھتیس گڑھ اور بنگال سے ہے۔ملک کی دیگر ریاستوں اترپردیش کے علاوہ مغربی بنگال میں موجود بیرون ریاست مزدوروں کی سہولت اور ان کے قیام و طعام کے انتظامات کئے جا رہے ہیں اور ان مزدوروں کو منتقلی کی تکالیف سے بچنے کی تاکید کرتے ہوئے کہا جا رہاہے کہ جب تک لاک ڈاؤن ختم نہیں ہوتا اس وقت تک وہ اسی مقام پر رہیں انہیں کسی قسم کی کوئی تکلیف نہیں ہوگی۔
