حیدرآباد 21۔نومبر (سیاست نیوز) تلنگانہ کابینہ کا اجلاس 25 نومبر کو 11 بجے دن سکریٹریٹ میں منعقد ہوگا۔ چیف سکریٹری رام کرشنا راؤ نے وزراء اور محکمہ جات کے پرنسپل سکریٹریز کو اجلاس کی اطلاع دیتے ہوئے اعلامیہ جاری کیا ہے۔ توقع ہے کہ مجالس مقامی انتخابات پر کابینی اجلاس میں اہم فیصلے کئے جائیں گے۔ حکومت نے 42 فیصد بی سی تحفظات پر عمل آوری میں قانونی رکاوٹ کو دیکھتے ہوئے پہلے مرحلہ میں پنچایت راج اداروں کے انتخابات کا فیصلہ کیا ہے جس میں پارٹی ٹکٹوں میں بی سی طبقات کو 42 فیصد نمائندگی دی جائے گی ۔ تلنگانہ ہائی کورٹ میں 24 نومبر کو بی سی تحفظات کے مسئلہ پر سماعت مقرر ہے۔ ہائی کورٹ کے فیصلہ کی صورت میں ریاستی کابینہ انتخابات کی حکمت عملی طئے کرے گی۔ ایم پی ٹی سی ، زیڈ پی ٹی سی ، میونسپلٹیز اور کارپورینشوں کے انتخابات کا فیصلہ کیا جائے گا۔ حکومت کے دو سال کی تکمیل پر یکم تا 9 ڈسمبر ریاست بھر میں تقاریب کا منصوبہ ہے۔ کابینہ اجلاس میں 9 روزہ تقاریب قطعیت دی جائے گی ۔ 9 ڈسمبر کو تلنگانہ رائزنگ 2047 ڈاکیومنٹ کو منظوری دی جاسکتی ہے۔ 1
