کنٹونمنٹ اسمبلی حلقہ کے کارخانہ میں پولیس اسٹیشن کی نئی عمارت کا افتتاح ، محمد محمود علی کا خطاب
حیدرآباد ۔ ریاستی وزیر داخلہ محمد محمود علی نے کہا کہ تلنگانہ کا لاء اینڈ آرڈر سارے ملک کیلئے مثالی ہے جس کا سہرہ چیف منسٹر کے سی آر کو جاتا ہے جنہوں نے امن کی برقراری، امن و سکون اور ہمہ جہتی ترقی کے معاملہ میں کسی قسم کا کوئی سمجھوتہ نہیں کیا۔ سکندرآباد کنٹونمنٹ اسمبلی حلقہ کارخانہ علاقہ میں پولیس اسٹیشن عمارت کے افتتاح کے بعد منعقدہ تقریب سے خطاب کرتے ہوئے ان خیالات کا اظہار کیا۔ اس موقع پر ریاستی وزراء ٹی سرینواس یادو، ملا ریڈی، رکن اسمبلی سائینا، ڈی جی پی مہیندر ریڈی، سٹی پولیس کمشنر انجنی کمار کے علاوہ دوسرے قائدین اور پولیس عہدیدار موجود تھے۔ وزیر داخلہ نے خطاب کرتے ہوئے کہا کہ حکومت نے 1000 مربع گز اراضی پر پولیس اسٹیشن کی شاندار عمارت تعمیر کی ہے جس پر 4.25 کروڑ روپئے خرچ کئے گئے ہیں۔ علحدہ ریاست تلنگانہ کے قیام کے بعد سے ہی چیف منسٹر کے سی آر نے محکمہ پولیس پر خصوصی توجہ دی ہے جس کا نتیجہ ہے کہ آج تلنگانہ میں امن و امان برقرار ہے اور عوام خوشحال زندگی گذر بسر کررہے ہیں۔ محمد محمود علی نے کہا کہ تلنگانہ حکومت نے محکمہ پولیس کو معقول بجٹ فراہم کیا ہے جس کی مثال تاریخ میں نہیں ملتی۔ تلنگانہ میں پہلی مرتبہ فرینڈلی پولیسنگ سسٹم پر عمل کیا جارہا ہے جس کے مثبت نتائج برآمد ہورہے ہیں۔ عوام اور پولیس کے درمیان خوشگوار تعلقات استوار ہوئے ہیں۔ تلنگانہ حکومت نے خواتین کے تحفظ پر اولین ترجیح دی ہے اور ان کے لئے محکمہ پولیس میں علحدہ ونگ شی ٹیم کے نام سے قائم کیا گیا ہے۔ بھروسہ سنٹر تشکیل دیا گیا ہے اور پولیس افسران کیلئے 700 کروڑ روپیوں کی لاگت سے جدید آلات سے لیس گاڑیاں خریدی گئی ہیں۔ وزیر داخلہ نے کہا کہ عوام کے تحفظ اور لاء اینڈ آرڈر کی برقراری کیلئے ریاست میں 6.60 لاکھ سی سی ٹی وی کیمرے نصب کئے گئے ہیں جو ملک میں نصب کردہ سی سی کیمروں کا 64 فیصد حصہ ہے۔ جبکہ شہر حیدرآباد کو سی سی کیمروں میں دنیا بھر میں16 واں مقام حاصل ہے۔ محکمہ پولیس کی جانب سے پاسپورٹ ویریفکیشن کو صرف چار تا پانچ دن میں مکمل کیا جارہا ہے جبکہ ماضی میں اس کے لئے ماہ دیڑھ ماہ کا وقت لگتا تھا۔ پاسپورٹ کی اس تیز ترین خدمات کیلئے حکومت ہند کی جانب سے مسلسل چار سال سے ویری فاسٹ کا ایوارڈ حاصل ہورہا ہے۔ علحدہ تلنگانہ ریاست کی تشکیل اور اضلاع کی تشکیل جدید کے ساتھ رچہ کنڈہ ، ورنگل، سدی پیٹ، کریم نگر، راماگنڈم، نظام آباد اور کھمم میں 7 پولیس کمشنریٹس ، 15 ایس پی آفس، 24 ڈیویژنس 29 سرکل آفیسس اور 102 پولیس اسٹیشن کو منظوری دی گئی ہے۔ 700 کروڑ روپئے کے مصارف سے بنجارہ ہلز میں عالمی معیار کا ایک انٹیگریٹیڈ کمانڈ اینڈ کنٹرول سنٹر تعمیر کیا جارہا ہے جو محکمہ پولیس کے علاوہ دوسرے محکمہ جات کیلئے معاون و مددگار ثابت ہوگا۔