حیدرآباد 4مئی (یواین آئی) عزیز پاشاہ سابق رکن راجیہ سبھا و صدر تنظیم انصاف آل انڈیا نے کورونا وائرس کی وبا کے دوران ہمت وحوصلہ کے ساتھ جان کی پرواہ کئے بغیر خدمات انجام دینے والے محکمہ پولیس،صحت عامہ اور بلدی نظم ونسق کے لئے ریاستی حکومت کی جانب سے ایصال کی جانے والی مکمل تنخواہوں کے علاوہ دیگر الاونسس (خصوصی پیکیج)کی منظوری کو خوش آئند قرار دیتے ہوئے کہا کہ اس کورونا وائرس کے غضب ناک پھیلاو سے انسانی زندگیوں کو محفوظ رکھنے کے لئے ریاست تلنگانہ کے صحافیوں بالخصوص ریاست کی دوسری سرکاری زبان اردو سے وابستہ صحیفہ نگاروں کے لئے بھی اسی طرح کے پیکیج کو جاری کیاجائے ۔انہوں نے اپنے بیان میں اس خصوص میں زور دیتے ہوئے کہاکہ لاک ڈاون کی وجہ سے کئی اردو رسائل،جرائد بند ہوچکے ہیں جس کی وجہ سے کئی گھروں میں معاشی مشکل صورتحال ہے ۔انہوں نے کہاکہ اس بات سے انکار نہیں کیاجاسکتا کہ اردو صحافی بھی چیلنج بھرے دور سے گذر رہے ہیں۔انہوں نے وزیراعلی کے چندرشیکھرراو سے اس جانب توجہ دینے کی خواہش کی۔عزیز پاشاہ کو اس جانب صحافی طاہر رومانی،فرید ضیائی،سید علی الدین احمد اور حمید الدین محمود نے توجہ دلائی۔
