حیدرآباد 22جولائی (یواین آئی)تلنگانہ کے چیف سکریٹری سومیش کمار نے متعلقہ عہدیداروں کو ہدایت دی کہ وہ ریاست کے 16شدید بارش سے متاثرہ اضلاع میں کسی بھی قسم کے جانی یا پھر مالی نقصان کو روکنے کیلئے جنگی خطوط پر بچاو اقدامات کریں۔مسٹرکمار نے پیشرو عادل آباد، کھمم، کریم نگر اور ورنگل کے 16شدید بارش سے متاثرہ اضلاع کے کلکٹرس، ایس پیز کے ساتھ ٹیلی کانفرنس منعقد کی اور ان اضلاع میں صورتحال کا تفصیلی جائزہ لیا۔چیف سکریٹری نے کلکٹرس کو ہدایت دی کہ وہ صورتحال پر قریبی نظررکھیں۔انہوں نے کہاکہ اضلاع میں کنٹرول رومس کا قیام عمل میں لایاجائے ۔انہوں نے کہاکہ نشیبی علاقوں کے عوام کو ضرورت پڑنے پر محفوظ مقامات منتقل کیاجائے ۔تمام محکمہ جات کو چاہئے کہ وہ قریبی تال میل کے ساتھ کام کریں اور اس بات کو یقینی بنائیں کہ آبی ذخائر کے پشتے نہ ٹوٹنے پائیں۔انہوں نے کہاکہ پینے کے پانی، بجلی کی سپلائی اور سینی ٹیشن کو اولین ترجیح دی جائے ۔چیف سکریٹری نے تمام کلکٹرس کو یقین دہانی کروائی کہ حکومت ان کو تمام طرح کی مدد فراہم کرنے کے لئے تیار ہے ۔ان کو مشورہ دیا گیا کہ وہ راہل بوجااسپیشل چیف سکریٹری ڈیزاسٹر مینجمنٹ کے ساتھ کسی بھی قسم کے مدد کے لئے رابطہ میں رہیں۔
