حیدرآباد 20ستمبر(یواین آئی) ضلع مُلگ میں ماونوازوں کے پمفلٹس سے سنسنی پھیل گئی۔ضلع کے وینکٹاپورم منڈل میں ہفتہ کو ماؤ نواز پارٹی کے پمفلٹس منظر عام پر آئے جن میں عوام سے اپیل کی گئی کہ وہ سی پی آئی (ماؤ نواز) کے 21ویں یوم تاسیس تقاریب منائیں۔ یہ پمفلٹس پاتھراپورم ۔ ٹیکولا بورو گاؤں کے قریب بھدرچلم ۔ وینکٹاپورم شاہراہ پر پائے گئے ۔ ماؤ نواز مرکزی کمیٹی نے عوام سے کہا کہ وہ 21 تا 27 ستمبر پورے ملک میں انقلابی جذبہ کے ساتھ تقاریب کا انعقاد کریں۔ مرکزی کمیٹی نے پارٹی، پی ایل جی اے اور عوام کو منظم کرنے مضبوط تحریک بنانے کی ضرورت پر زور دیا تاکہ آپریشن کاگارکو شکست دینے جدوجہد جاری رکھی جا سکے ۔ اسکے علاوہ کمیٹی نے پارٹی کو ناقابلِ تسخیر بنانے ، صلاحیتوں میں اضافہ اور نقصان کو دور کرنے کی تاکید کی۔
