حیدرآباد27نومبر(یو این آئی) تلنگانہ کے کئی اضلاع سردی کی شدید لپیٹ میں ہیں جہاں گذشتہ چند دنوں سے درجہ حرارت میں بتدریج گراوٹ آرہی ہے ۔صبح میں کہر کی وجہ سے گاڑی سواروں کو مشکل کا سامنا ہے ۔کئی سوار اپنی گاڑیوں کی ہیڈلائٹس کو کھولتے ہوئے گاڑی چلانے پر مجبور ہیں۔دوسری طرف صبح کے اوقات میں چہل قدمی کرنے والے افراد اور کسان شیڈول کے برخلاف تاخیر سے اپنے کاموں اور سرگرمیوں کیلئے روانہ ہورہے ہیں۔ فٹ پاتھس پر سونے والے افرادکو بھی سردی کی وجہ سے مشکل کا سامنا ہے ۔ کئی لوگ سردی سے بچنے گرم کپڑوں جیسے گرم لحافوں اورسوئٹرس کا استعمال کررہے ہیں تو کئی افراد شام ہوتے ہی آگ تاپنے کا کام بھی کررہے ہیں۔ سردی سے بچے اور معمرین شدید متاثرہیں۔ صبح کی اولین ساعتوں سے ہی سرد ہوائیں چل رہی ہیں۔ اسپتالوں میں مریضوں کا ہجوم ہے ۔ نزلہ’ کھانسی’ زکام اور بخار میں کئی افراد مبتلا ہیں۔ گرم ملبوسات کی خرید و فروخت میں بھی اضافہ ہوگیا ہے ۔ عوام سویٹرس’ ٹوپیوں اور مفلرس کااستعمال کررہے ہیں۔ چائے خانوں پر عوام کا ہجوم دیکھا جارہا ہے ۔ شہر و اضلاع میں دن کے درجہ حرارت میں اضافہ ہوا ہے جبکہ رات کے اوقات میں درجہ حرارت میں گراوٹ دیکھی جارہی ہے جس کے سبب صبح اور شام کے اوقات میں سردی دیکھی جارہی ہے ۔ صبح میں 9بجے تک بھی سردی کی لہر دیکھی جارہی ہے ۔
