نئی دہلی۔ 17 جولائی (سیاست ڈاٹ کام) مرکزی وزیر داخلہ امت شاہ نے آج دو ٹوک الفاظ میں کہا کہ ملک بھر میں غیر قانونی شہریوں کی پہچان کرکے انچ بہ انچ زمین خالی کرائی جائے گی اور انہیں بین الاقوامی قانون کے مطابق واپس بھیجا جائے گا۔ امیت شاہ نے بدھ کو راجیہ سبھا میں ضمنی سوالات کے جواب میں کہاکہ بھارتیہ جنتاپارٹی کے لوک سبھا انتخابات کے منشور اور صدر کے خطاب میں یہ واضح طورپر لکھا ہے کہ ملک بھر سے غیر قانونی شہریوں کی شناخت کرکے انہیں بین الاقوامی قانون کے تحت واپس بھیجا جائے گا۔انہوں نے کہا کہ وہ ایوان میں اس بات کو دہرا رہے ہیں۔ انہوں نے کہا کہ قومی شہریت رجسٹر(این آر سی)آسام سمجھوتے کا حصہ ہے اور اسے اس سمجھوتے کے مطابق ہی تیار کیا جارہا ہے ۔ اس سے پہلے وزیر مملکت برائے داخلہ نتیانند رائے نے کہا کہ این آر سی کو تیار کرنے میں بے حد احتیاط برتی جارہی ہے ار یہ یقینی بنایا جارہا ہے کہ کسی ہندوستانی شہری کا نام اس سے باہر نہ رہے اور کسی غیرقانونی شخص کا نام اس میں شامل نہ ہوپائے ۔انہوں نے کہا کہ سپریم کورٹ نے اس رجسٹر کو 31جولائی تک شائع کرنے کا حکم دیا ہے لیکن 25لاکھ لوگوں نے دستخط کے ساتھ صدر کو درخواست دی ہے کہ اس کی مدت بڑھائی جائے ۔اس لئے حکومت سپریم کورٹ سے اس کی مدت میں اضافہ کرنے کی اپیل کرے گی۔انہوں نے کہا کہ این آر سی کو پوری باریکی سے نافذ کیاجائے گا۔ ایک دیگر سوال کے جواب میں انہوں نے کہا کہ روہنگیا طبقے کے لوگ ملک کے مختلف حصوں میں پھیلے ہوئے ہیں اور ان میں سے کچھ بنگلہ دیش بھی چلے گئے ہیں اس لئے ابھی حکومت کے پاس ان کی مخصوص تعداد سے متعلق اعدادو شمار نہیں ہیں۔
۔3 سال میں 400 دہشت گردوں کی دراندازی: کشن ریڈی
حکومت نے بتایا ہے کہ گزشتہ تین سال میں جموں و کشمیر میں تقریباً 400 دہشت گردوں نے دراندازی کی ہے۔ لوک سبھا میں مملکتی وزیر داخلہ جی کشن ریڈی نے ایوان کو بتایا کہ 126 دراندازوں کو سکیوریٹی فورسس نے ہلاک کردیا۔ 27 سکیوریٹی پرسونل نے دراندازوں کے ساتھ جھڑپوں میں اپنی جانیں گنوائیں۔ مملکتی وزیر داخلہ نے مزید بتایا کہ ابھی تک 4 دہشت گردوں کو گرفتار کیا گیا ہے۔