ڈاکٹر عبدالقدیر صدر رابطہ ملت منتخب
بیدر؍محمد معظم جنرل سیکریٹری تنظیم رابطہ ملت ضلع بیدر کی جاری کردہ پریس ریلیز کے مطابق تنظیم رابطہ ملت کی مجلس عاملہ کا اجلاس مسجد نور خاں تعلیم بیدر میں منعقد ہوا ۔ اس اجلاس کی صدارت مولانا سید عبدالوحید قاسمی صاحب صدر، رابطہ ملت ضلع بیدر نے کی۔ اجلاس کا آغاز مولانا مونس کرمانی کی تلاوت کلام پاک سے ہوا۔ محمد معظم جنرل سیکریٹری رابطہ ملت نے مولانا سید عبدالوحید قاسمی صاحب کی صدارت میں رابطہ ملت کی کار گزاری کی تفصیلات بیان کیں اور اجلاس کو واقف کروایا کہ مولانا سید عبدالوحید قاسمی کسی ناگزیر وجوہات کی بناء پر مستعفی ہورہے ہیں۔ شرکا ئے اجلاس نے مولانا محترم سے اصرار کیا کہ وہ مستعفی نہ ہو، لیکن مولانا نے اپنی نجی مصروفیات کے سبب مستعفی ہونا ہی پسند کیا۔ مولانا موصوف نے اصرار پر تمام شرکاء نے آپ کی درخواست قبول کرلی۔ بعد ازاں عاملہ کے اجلاس میں مولانا کے استعفی کو قبول کرنے کے بعد محمد رفیق احمد نے ڈاکٹر عبدالقدیر کا نام صدارت کے لئے پیش کیا ۔ جس پر اجلاس میں شریک محمد کفایت اللہ صدیقی، مولانا مونس کرمانی ، مولانا عتیق الرحمن رشادی، شیخ مجیب الرحمن قاسمی ، حامد محی الدین قادری، اختر محی الدین ، خلیل احمد، محمد فراست علی ایڈوکیٹ ، محمد آصف الدین، محمد نظام الدین ،محمد امیر الدین، محمد یوسف الدین، افتخار احمد ار دیگر حاضرین نے ڈاکٹر عبدالقدیر صاحب کے نام کی فرداًفرداً تائید کی۔ اس طرح سے ڈاکٹر عبدالقدیر صاحب کو صدر رابطہ ملت ضلع بیدر منتخب کرلیا گیا۔ اسی اجلاس میں باضابطہ طور پر مولانا سید عبدالوحید قاسمی نے اعلان فرمایا کہ ڈاکٹر عبدالقدیر صاحب متفقہ طور پر صدر رابطہ ملت ضلع بیدر منتخب ہوئے ہیں۔ نو منتخب صدر نے اس موقع پر اپنے تاثرات پیش کرتے ہوئے کہا کہ اتحادملت وقت کی اہم ترین ضرورت ہے ۔ اس کو فروغ دینے کے لئے ہمہ وقت سرگرم رہنے کی ہم کوشش کریں گے۔ ساتھ ہی رابطہ ملت کے تمام امور کی انجام دہی کے لئے باہمی مشاورت کو پیش نظر رکھاجائے گا۔ سابق صدر سید عبدالوحید قاسمی صاحب کی دعا پر اجلاس اپنے اختتام کو پہونچا۔