تونس سٹی : تونس کی ایک عدالت نے النہضہ تحریک کے سربراہ راشد غنوشی اور ان کے داماد رفیق عبدالسلام کو فوری طور پر 3 سال قید کی سزا سنائی ہے۔ ان پر الزام ہیکہ ان کی جماعت کو 2019ء کے انتخابات کے دوران غیر ملکی فنڈنگ حاصل ہوئی تھی مگر انہوں نے اس فنڈ کی وضاحت نہیں کی۔ فیصلہ سنائے جانے کے موقع پر الغنوشی عدالت میں موجود نہیں تھے۔ تونس کی کورٹ آف فرسٹ انسٹینس میں بدعنوانی کے مقدمات کی جانچ کے ذمہ دار ونگ چیمبرنے فیصلہ دیا کہ النہضہ کے صدر راشد غنوشی اور ان کے داماد رفیق بن عبدالسلام بوشلاکہ کو فوری طور پر تین سال کیلئے قید کی سزا سنائی گئی ہے۔
ایک عدالتی اہلکار نے کہاکہ انہیں یہ سزا بیرون ملک سے ملنے والی فنڈنگ کو خفیہ رکھنے پر سنائی گئی ہے۔تونس کی عدالتِ اوّل کے سرکاری ترجمان محمد زیتونہ نے جمعرات کے روز العربیہ/الحدث کو بتایا کہ النہضہ کو تقریباً 11 لاکھ 70 ہزار امریکی ڈالرکی رقم بیرون ملک سے ملنے کا الزام عاید کیا گیا تھا۔
