دبئی۔7 جون ۔(سیاست ڈاٹ کام) لیبیا میں جنگ بندی کے حوالے سے مصر کی کوششوں کے بعد العربیہ کو باوثوق ذرائع سے معلوم ہوا ہے کہ قاہرہ نے یورپی ممالک سے جنگجوئوں کی لیبیا منتقلی روکنے کیلئے ترکی پردبائو ڈالنے کیلئے مشاورت شروع کی ہے۔ ذرائع کا کہنا ہے کہ قاہرہ کی طرف سے یورپی ممالک کے ساتھ بات چیت میں 48 گھنٹے میں لیبیا میں جنگ بندی کی ضمانت حاصل کرنے اور جنگجوئوں کی پسپائی کی یقین دہانی حاصل کرنیکی کوشش کی جا رہی ہے۔مصری وزیرخارجہ سامح شکری نے ہفتے کے روزاقوام متحدہ کے سیکرٹری جنرل انتونیو گوٹیرس، افریقی یونین کے چیئرمین موسیٰ فقیہ، الجزائر، مراکش، تونس، نیجر، سعودی عرب، امارات اور اردن کے وزرا خارجہ سے ٹیلیفون پر لیبیا کی تازہ صورتحال اور جنگ بندی کی کوششوں پرمشاورت کی۔ مصری وزیرخارجہ نے جنرل خلیفہ حفتر اور مصری صدر السیسی کے درمیان ہونے والی ملاقات اور لیبیا میں جنگ بندی کی کوششوں کے بارے میں تفصیلات سے آگاہ کیا۔
