کراچی ۔ یکم اکٹوبر (سیاست ڈاٹ کام ) سری لنکا کے خلاف دوسرے ونڈے میچ میں سنچری کی بدولت نوجوان پاکستانی بیٹسمین بابر اعظم نے ہندوستانی کپتان ویراٹ کوہلی کا ریکارڈ توڑ دیا اور تیز ترین 11 سنچریاں بنانے والے کھلاڑیوں کی فہرست میں تیسرے نمبر پر آ گئے ہیں۔ بابر اعظم نے کراچی میں 10سال بعد کھیلے گئے ونڈے میچ کو شائقین اور اپنے لیے یادگار بناتے ہوئے شاندار سنچری اسکور کی۔ نیشنل اسٹیڈیم میں بابر اعظم نے عمدہ کھیل پیش کرتے ہوئے 105 گیندوں پر 4 چھکوں اور 8 چوکوں کی مدد سے 115 رنز کی اننگز کھیلی۔ اس اننگز کے ساتھ ہی بابر اعظم تیز ترین 11ویں سنچری بنانے والے کھلاڑیوں کی فہرست میں تیسرے نمبر پر آ گئے ہیں اور انہوں نے کوہلی کو ریکارڈ سے محروم کردیا۔ کوہلی نے 82 ویں اننگز میں 11ویں سنچری کا اعزاز حاصل کیا تھا اور تیز ترین 11 سنچریاں بنانے والے کھلاڑیوں کی فہرست میں تیسرے نمبر پر موجود تھے لیکن بابر نے انہیں اس اعزاز سے محروم کردیا اور انہوں نے کیریئر کی 71ویں اننگز میں یہ اعزاز حاصل کیا۔ ونڈے کرکٹ میں سب سے کم اننگز کھیل کر 11 سنچریاں بنانے کا اعزاز جنوبی افریقی سابق اوپنر ہاشم آملہ کے پاس ہے جنہوں نے 64 اننگز میں یہ کارنامہ انجام دیا تھا جبکہ65 اننگز کھیل کر 11 سنچریاں بنانے والے ان کے ہم وطن وکٹ کیپر کوئنٹن ڈی کاک فہرست میں دوسرے نمبر پر موجود ہیں۔ اس اننگز کے دوران بابر اعظم نے ایک اور کارنامہ بھی انجام دیا اور وہ پاکستان کی جانب سے ایک کیلنڈر ایئر میں تیز ترین ایک ہزار رنز بنانے والے کھلاڑی بن گئے جہاں انہوں نے 19اننگز میں یہ کارنامہ انجام دیا۔
