پرتھ ۔6 نومبر (سیاست ڈاٹ کام ) پاکستان اور آسٹریلیا کی کرکٹ ٹیموں کے درمیان تیسرا ٹی ٹوئنٹی جمعہ کو پرتھ میں کھیلا جائے گا، آخری میچ میں ٹیم پاکستان میں کم ازکم دو سے 3 تبدیلیاں یقینی ہیں، جبکہ آسٹریلیا نے فاسٹ بولر پیٹ کمنزکو آرام دینے کا فیصلہ کیا ہے۔ پاکستان کرکٹ ٹیم آج ہی کینبرا سے پرتھ پہنچ گئی ہے ۔ تین میچوں کی سیریز میں آسٹریلیا کو 1-0 کی برتری حاصل ہے، پہلا میچ بارش کی نذر ہوا تو دوسرے میچ میں میزبان نے 7 وکٹ سے فتح اپنے نام کی تھی۔ ذرائع کے مطابق جمعہ کو ہونے والے سیریز کے آخری ٹی ٹوئنٹی میچ میں گرین شرٹس کم ازکم دو سے تین تبدیلیوں کے ساتھ میدان میں اترے گی۔ ٹیم میں فخر زمان اور آصف علی کی جگہ امام الحق اور خوشدل شاہ کو فائنل الیون میں شامل کیا جائے گا، جبکہ وہاب ریاض اور محمد عرفان میں سے بھی کسی ایک بولر کے باہرکیے جانے کا امکان ہے۔ دوسری جانب آسٹریلیا نے سیریز کے تیسرے اور آخری ٹی ٹوئنٹی میچ کے لئے فاسٹ بولر پیٹ کمنز کو آرام دینے کا فیصلہ کیا ہے۔ آسٹریلیا کے ہیڈ کوچ جسٹن لینگر نے کہا ہے کہ کمنز کے لیے ٹسٹ سیریز سے پہلے آرام بہت ضروری ہے، ٹیم میں کچھ ردو بدل ہو گا لیکن جیت کا فارمولانہیں بدلے گا، وہ ٹی ٹوئنٹی سیریز جیتنا چاہتے ہیں۔
