تہران :15جون ( ایجنسیز ) ایران نے اسرائیل کی حمایت پر برطانیہ، فرانس اور امریکہ کے فوجی اڈوں کو نشانہ بنانے کی دھمکی دے دی۔ غیرملکی نیوز ایجنسی کی رپورٹ کے مطابق ایران کا کہنا ہے کہ اسرائیل کی حمایت کرنے پر اڈوں اور بحری جہازوں کو نشانہ بنایا جائے گا۔اسرائیلی وزیر دفاع نے ردعمل دیتے ہوئے کہا کہ ایران نے میزائل حملے بند نہ کیے تو تہران جل جائے گا۔ ڈونالڈ ٹرمپ نے کہا ہے کہ امریکہ اسرائیل کے دفاع میں مدد کرے گا اور امریکی حکام کے حوالے سے خبروں میں کہا گیا ہے کہ امریکی افواج نے پہلے ہی ایرانی ڈرون اور میزائلوں کو مار گرانے میں مدد کی ہے کیونکہ وہ اسرائیل کے قریب پہنچ چکے ہیں۔فرانس کے صدر ایمانوئل میکرون نے بھی جمعہ کے روز کہا کہ ان کا ملک ایرانی انتقامی کارروائیوں کے خلاف اسرائیل کے دفاع میں مدد کرے گا۔ برطانیہ کی حکومت نے کہا ہے کہ اس کی افواج نے اسرائیل کو کوئی فوجی امداد فراہم نہیں کی ہے کیونکہ وزیر اعظم کیئر اسٹارمر نے کشیدگی میں کمی کی ضرورت پر زور دیا ہے۔ اقوام متحدہ کی سلامتی کونسل اجلاس سے خطاب میں امریکی سفارتکار میک کوئے کا کہنا تھا کہ امریکی اڈوں یا خطے میں امریکی انفراسٹرکچر کو نشانہ بنایا گیا تو سنگین نتائج ہوں گے۔ایران اور اسرائیل کے درمیان تین دن سے جاری کشیدگی کے نتیجہ میں پورا خطہ سنگین صورتحال سے دوچار ہے ۔ دونوں ممالک مسلسل ایک دوسرے پر میزائیل حملے کررہے ہیں جس سے دونوں ملکوں میں جانی اور مالی نقصانات کی اطلاعات ہیں ۔ اسرائیل کے حامی ممالک اس کشیدگی میں ایران کے خلاف اسرائیل کی مدد کررہے ہیں جس پر ایران نے برہمی کا اظہار کیا ۔
