اسلام آباد: پاکستانی آل راؤنڈر شعیب ملک کی اہلیہ اور سابق ہندوستانی ٹینس اسٹار ثانیہ مرزا نے غزہ کی موجودہ صورتحال پر دنیا کی خاموشی دیکھ کر تشویش کا اظہار کیا ہے۔ثانیہ نے اپنی انسٹاگرام پر اکتوبر کے آغاز سے غزہ میں جاری اسرائیل کی وحشیانہ بمباری میں فلسطینی بچوں کی ہلاکتوں پر دنیا کی خاموشی کو اجاگر کرتی ایک سوشل میڈیا پوسٹ شیئر کی ہے۔ اْنہوں نے سوشل میڈیا پوسٹ کے کیپشن میں لکھا ہیکہ یہ سلسلہ اب بھی جاری ہے اور ہم ابھی تک خاموش ہیں۔ غزہ میں اسرائیلی فوج کی بمباری میں اب تک شہید فلسطینیوں کی تعداد 8 ہزار سے تجاوز کر گئی ہے۔ جبکہ شہداء میں 3600 بچے بھی شامل ہیں۔اس حوالے سے فلسطینی وزارتِ صحت کا کہنا ہے کہ اسرائیلی فوج نے 7 اکتوبر سے اب تک 825 فلسطینی خاندانوں کا اجتماعی قتل عام کیا ہے۔
