نئی دہلی 29 جولائی (سیاست ڈاٹ کام) راجیہ سبھا چیرمین ایم وینکیا نائیڈو آج اُس وقت اشکبار ہوئے جب اُنھوں نے اپنے پرانے دوست اور سابق مرکزی وزیر ایس جئے پال ریڈی کی تعزیتی قرارداد پڑھتے ہوئے کہاکہ اُنھیں اِس انتقال پر دُکھ ہے۔ جب ایوان کی کارروائی شروع ہوئی تب نائیڈو نے ریڈی کے لئے تعزیتی قرارداد پڑھی۔ جئے پال ریڈی کا اتوار کو 77 سال کی عمر میں انتقال ہوا۔ اُنھوں نے اپریل 1990 ء سے اپریل 1996 ء تک اور ستمبر 1997 ء سے مارچ 1998 ء تک دو میعادوں تک ایوان بالا آندھراپردیش کی نمائندگی کی تھی۔
