نئی دہلی: وزارت داخلہ نے مبینہ ‘فیڈ بیک یونٹ’ جاسوسی کیس میں دہلی کے نائب وزیر اعلی منیش سیسوڈیا کے خلاف انسداد بدعنوانی ایکٹ کے تحت مقدمہ چلانے کے لئے آج سی بی آئی کو منظوری دے دی۔ سیسوڈیا شراب پالیسی کیس میں پہلے ہی سی بی آئی کے ریڈار پر ہیں۔سی بی آئی کے مطابق عام آدمی پارٹی نے 2015 میں دہلی میں اقتدار میں آنے سے پہلے سیاسی انٹیلی جنس اکٹھا کرنے کیلئے ایک فیڈ بیک یونٹ تشکیل دیا تھا اور سیسوڈیا اس یونٹ کے سربراہ تھے ۔ دریں اثنا اے اے پی نے پہلے ان الزامات کو مسترد کر دیا تھا۔دہلی بی جے پی نے رد عمل ظاہر کرتے ہوئے اس معاملے میں منیش سیسوڈیا کے خلاف مقدمہ چلانے کی منظوری دینے کے وزارت داخلہ کے فیصلے کا خیر مقدم کیا۔بی جے پی کے ریاستی ورکنگ صدر وریندر سچدیوا نے ایک پریس کانفرنس سے خطاب کرتے ہوئے کہا کہ سی بی آئی کو فوری طور پر سیسوڈیا کو گرفتار کرنا چاہئے ۔
