قاہرہ : دنیا میں مسلمانوں کی سب سے بڑی دینی درس گاہ مصر کی جامعہ الازہر نے پاکستان میں پولیو ویکسین پر پابندی کے حوالے سے فتوے جاری کرنے سے خبردار کرتے ہوئے کہا ہے کہ پولیو ویکسین ایک مذہبی، طبی اور انسانی فریضہ ہے۔رپورٹ کے مطابق یونیورسٹی کی جانب سے ٹوئٹ کرتے ہوئے کہا گیا کہ پولیو ویکسین پر پابندی عائد کرنا پاکستان میں بچوں اور خاندانوں کے حقوق کی خلاف ورزی ہے، شریعت کے مطابق ایسی ویکسین کے استعمال سے گریز ممنوع ہے جو بچے کی صحت کے لیے فائدہ مند ہو۔پاکستان میں بچوں کو پولیو ویکسین پلانے کے لیے حکام کو ویکسین کے حوالے سے افواہوں، خوف اور ورکرز پر تشدد کا بڑا چیلنج درپیش ہے جہاں رواں سال ملک میں اس لاعلاج مرض کے 19 کیسز رپورٹ ہو چکے ہیں۔وزیرصحت عبدالقادر پٹیل کی قاہرہ میں جامعہ الازہر کے امام احمد الطیب سے ملاقات ہوئی، ملاقات میں عبدالقادر پٹیل نے پاکستان میں سیلاب سے تباہ کاریوں کے حوالے سے آگاہ کیا۔پاکستان کی وزارت برائے قومی صحت اور خدمات نے ٹوئٹ کرتے ہوئے ملاقات کی تصدیق کی۔
