نئی دہلی ، 04 اپریل ( سیاست ڈاٹ کام) دہلی پولیس کی کرائم برانچ کی ٹیم نے شہریت ترمیمی قانون (سی اے اے) کے خلاف احتجاج کے دوران 15 دسمبر کو نیو فرینڈس کالونی کے قریب ہوئے تشدد کے کیس میں جامعہ نگر علاقے کے مقامی رہنما آشو خان کو آج گرفتار کیا ہے۔ایک پولیس اہلکار نے بتایا کہ آشو خان کے خلاف نیو فرینڈس کالونی اور جامعہ نگر میں تشدد کے معاملے میں مقدمہ درج کیا گیا تھا۔ پولیس کے ذریعے تحقیقات کے بعد اسے آج یہاں گرفتارکرکے ساکیت کورٹ ڈیوٹی میٹرو پولیٹن مجسٹریٹ کے یہاں پیش کیا گیا۔ عدالت نے اسے دو دن کے لیے پولیس حراست میں بھیج دیا ہے۔غور طلب ہے کہ جامعہ میں گذشتہ سال دسمبر میں شہریت ترمیمی قانون کے خلاف احتجاج کے دوران مظاہرین نے نیوفرینڈس کالونی اور جولینا کے قریب ہونے والے تشدد کے واقعات ہوئی تھیں۔
یہاں مظاہرین نے مبینہ طور پر بسوں کو نذر آتش کردیا تھا۔ پولیس مظاہرین کا تعاقب کرتے ہوئے جامعہ کیمپس اور لائبریری میں داخل ہوئی اور طلبا کو بے رحمی وحشیانہ طور پر جم کر زد و کوب کیا اور لائبریری میں توڑ پھوڑ بھی کی۔ اس معاملے میں ، جامعہ کی انتظامیہ نے پولیس کے خلاف کارروائی کے لیے عدالت سے رجوع بھی کیا ہے۔
