ٹوکیو 26 اکتوبر ( سیاست ڈاٹ کام ) جاپان کے چیبا اور فوکو شیما میںشدید سیلاب سے 10 افراد کی موت ہو گئی اور چار افراد لاپتہ ہیں ۔مقامی میڈیا کے مطابق سیلاب اور لینڈ سلائیڈنگ کی وجہ سے تین، دریا میں بہہ جانے کی وجہ سے دو اور گاڑی سمیت ڈوب جانے سے تین افراد کی دردناک موت ہو گئی۔جاپان کے وزیر اعظم شینزو آبے نے ڈیزاسٹر مینجمنٹ محکمہ کو شہریوں کی جان بچانے ہر ممکن اقدامات کی ہدایات دی ہیں۔مسٹر آبے نے سوشل میڈیا پر کہامیں نے ابھی 2019 کے ٹائیفون نمبر- 19 کیلئے ہنگامی ہیڈکوارٹر کی 12 ویں میٹنگ بلائی ہے ۔ تمام وزارتوں اور ایجنسیوں کو تمام ضروری اقدامات کرنے اور محتاط رہنے کی ہدایت دی ہے ۔ آفات سے نمٹنے ہم ہر ممکن کوشش کریں گے۔این ایچ کی رپورٹ کے مطابق موسلا دھار بارش سے ناریتا بین الاقوامی ہوائی اڈے پر زیادہ تر پروازیں یا تو منسوخ یا ملتوی کر دی گئی جس کی وجہ سے تین ہزار مسافروں کو مجبوراً ہوائی اڈے پر ہی رات گذارنی پڑی۔ ہوائی اڈے کی انتظامیہ نے اس دوران لوگوں کی مدد کیلئے کپڑے اور کھانے بھی تقسیم کئے ۔چیبا کے علاقے میں دراصل جمعہ کو آدھے ہی دن میں پورے مہینے کے برابربار بارش ہو گئی جس کی وجہ ے علاقے میں حالات انتہائی خراب ہو گئے ہیں۔ تقریبا 13 ندیوں کی آبی سطح خطرے کے نشان سے اوپر ہیں اور ابھی تک 50،000 لوگوں کو محفوظ نکالا گیا ہے ۔ اس کے علاوہ کئی مقامات پر لینڈ سلائیڈنگ کی اطلاعات ہیں۔
