ٹوکیو، 28 اکتوبر (یواین آئی) جاپان کی نئی وزیرِاعظم سانائے تاکائچی نے امریکی صدر ڈونلڈ ٹرمپ سے ملاقات کے دوران دوطرفہ تعلقات میں نرمی اور تجارتی کشیدگی کم کرنے کیلئے ذاتی تعلقات کو مضبوط بنانے پر زور دیا ہے ۔ خبر رساں ادارے ایسوشی ایٹڈ پریس کے مطابق جاپانی حکومت ٹرمپ کو خوش کرنے کیلئے امریکی کمپنی فورڈ کی مشہور ایف-150 ٹرک خریدنے کے علامتی اقدام پر غور کر رہی ہے ، اگرچہ ماہرین کے نزدیک جاپان کے شہروں کی تنگ گلیوں میں ان بڑی گاڑیوں کا استعمال عملی طور پر مشکل ہو گا۔ٹرمپ نے اس تجویز پر خوشی ظاہر کرتے ہوئے کہا کہ یہ شان دار ٹرک ہے اور جاپانی وزیراعظم کا ذوق اچھا ہے ۔ جاپان کی سڑکوں پر فورڈ ٹرکوں کی موجودگی ٹرمپ کیلئے ایک علامتی کامیابی ہوگی، کیونکہ وہ طویل عرصے سے شکایت کرتے رہے ہیں کہ امریکی گاڑیاں جاپانی مارکیٹ سے باہر رکھی گئی ہیں جہاں ٹویوٹا، نسان، ہونڈا، سبارو اور مٹسوبشی کا غلبہ ہے ۔ اخبار “نکی” کے مطابق تاکائچی … ٹرمپ کے قیام کے دوران کسی مقام پر F-150 ٹرکوں کی نمائش کا انتظام کر سکتی ہیں۔ حکومت ان ٹرکوں کو وزارتِ ٹرانسپورٹ کیلئے سڑکوں کی نگرانی اور بنیادی ڈھانچے کے معائنے میں استعمال کرنے پر غور کر رہی ہے ۔ ادھر اطلاعات ہیں کہ ٹویوٹا موٹر کارپوریشن کے چیئرمین اکیو ٹوئیوڈا … ٹرمپ کے اعزاز میں عشائیے کے دوران امریکی گاڑیاں درآمد کرنے کا منصوبہ پیش کر سکتے ہیں۔
فورڈ کمپنی کے ترجمان ڈیو ٹوور نے کہا کہ انہیں خوشی ہے کہ امریکی صدر مقامی مصنوعات کی حوصلہ افزائی کر رہے ہیں اور کمپنی جاپان میں سرکاری اداروں کو اپنا مشہور ٹرک فراہم کرنے کیلئے تیار ہے ۔
