غزہ : رواں ماہ کی 6 تاریخ سے غزہ پٹی کے شمال میں جبالیا پر اسرائیلی حملوں کا سلسلہ جاری ہے۔ تازہ ترین کارروائی میں علاقے میں ایک ہاسپٹل پر بمباری کی گئی ہے۔کمال عدوان ہاسپٹل کے ڈائریکٹر ڈاکٹر حسام ابو صف نے جمعہ کے روز بتایا کہ جبالیا میں واقع ہاسپٹل پر اسرائیلی ٹینکوں کی مسلسل گولہ باری کے نتیجے میں طبی عملے کے کئی ارکان زخمی ہو گئے۔بعد ازاں العربیہ کے نمائندے نے بتایا کہ اسرائیلی فوج نے کمال عدوان ہاسپٹل پر دھاوا بول دیا۔ اسرائیلی فوج نے تمام زخمیوں اور ان کے ہمراہ موجود افراد کو ہاسپٹل کی کھلی جگہ پر اکٹھا کیا اور پھر مردوں کو خواتین سے الگ کر دیا۔واضح رہے کہ رواں ماہ 6 اکتوبر سے اسرائیل نے غزہ پٹی کے شمالی علاقوں پر نیا حملہ شروع کیا۔ فلسطینی شہری دفاع کے مطابق اس کے نتیجے میں چند روز کے دوران میں تقریبا 800 افراد جاں بحق ہو چکے ہیں۔دوسری جانب غزہ پٹی کے جنوب میں العربیہ کے نمائندے کے مطابق اسرائیل نے خان یونس شہر پر بمباری کی۔ اس کے نتیجے میں 24 افراد اپنی جانوں سے ہاتھ دھو بیٹھے۔شہری دفاع کے مطابق اس کے کارکنان نے اب تک 14 نعشیں نکال لی ہیں۔ اس سے قبل اسرائیلی فوج نے خان یونس کے جنوبی علاقے المنارہ میں ایک گھر پر میزائل داغا تھا۔
