نئی دہلی ۔اداکارہ کیارا اڈوانی جو اپنی آنے والی فلم جگ جگ جیو کا پہلا گانا منظر عام پر لانے کے لیے دارالحکومت میں تھیں،انہوں نے اس سوال سے پرہیز کیا کہ وہ اپنے مشہور دوست اور اداکار سدھارتھ ملہوترا کے ساتھ کب شادی کے بندھن میں بندھ رہی ہیں۔ اداکارہ سے یہ سوال اس لئے بھی کیا گیا کیونکہ ان کی سدھارتھ کے ساتھ دوستی اور محبت کے ہر سو چرچے ہیں۔ اداکارہ نے اس سوال کا جواب دیا ہے اور کہا ہے کہ جب ہوگی شادی میں آپ کو ضرور مدعو کروں گی اوردعوت بھی دوں گی۔ فی الحال صرف فلموں میں میری شادی ہورہی ہے آپ مجھے دلہن کے روپ میں بڑے پردے پر دیکھ سکتے ہیں اور جب بھی حقیقی زندگی میں شادی ہوگی آپ سب کو معلوم ہو جائے گا۔ میں آپ کو مدعو بھی کروں گی اور دعوت بھی دوں گی۔کیارا اور سدھارتھ کے بارے میں افواہیں ہیں کہ وہ کافی عرصے سے دام الفت میں گرفتار ہیں تاہم ان دونوں میں سے کسی نے بھی ان افواہوں کے تعلق سے کوئی تبصرہ نہیں کیا۔دونوں میں سے کسی نے بھی نہ انکا ر کیا اور نہ ہی اقرار کیا ہے۔
