ریاض: سعودی عرب میں مکہ مکرمہ ریجن کے ساحلی اور بین الاقوامی شہر جدہ کی 900 برس پرانی مسجد ’ابو عنبہ‘ امیر محمد بن سلمان منصوبے کے دوسرے مرحلے میں از سر نو تعمیر کی جائے گی۔میڈیا کے مطابق مسجد ابو عنبہ 544ھ یعنی 1149 سے پہلے تعمیر کی گئی تھی۔ تاریخی حوالوں میں بتایا گیا ہے کہ یہ مسجد جہاں تعمیر کی گئی ہے وہاں انگوروں کی بیل ہوا کرتی تھی جس کی آبپاشی وہاں ایک کنویں سے کی جاتی تھی۔ عربی زبان میں انگور کے لیے ’عنب‘ کا لفظ استعمال ہوتا ہے اسی مناسبت سے مسجد کا نام ’ابو عنبہ‘ پڑ گیا۔ 900 برس پرانی مسجد ابو عنبہ کا امتیازی وصف یہ ہے کہ یہ اب تک آباد ہے اور اس میں پابندی سے نماز ادا کی جاتی ہے۔ امیر محمد بن سلمان منصوبے کے تحت مسجد ابو عنبہ کی اصلاح و مرمت مغربی ریحن کے طرز تعمیر کے مطابق ہوگی۔
