برلن ؍ کوپن ہیگن : جرمنی اور ڈنمارک میں حکام نے دہشت گرادنہ کارروائیاں انجام دینے کی کوشش کرنے والے 13مشتبہ افراد کو گرفتار کیا ہے۔ پولیس نے ایسا کیمیائی مادہ بھی ضبط کیا ہے جو دھماکہ خیز اشیاء بنانے میں استعمال ہوسکتا تھا۔ ڈنمارک میں حکام نے جمعرات 11 فروری کو بتایا کہ الگ الگ کارروائیوں میں 13 افراد کو حراست میں لیا گیا جس میں سے 7 پر دہشت گردانہ کارروائیوں کی کوشش کا الزام عائد کیا گیا ہے۔ اسی کیس کے سلسلے میں جرمنی میں بھی ایک مشتبہ شخص کو گرفتار کیا گیا ہے۔ڈنمارک کی وزارت انصاف نے اس بارے میں اپنی ایک ٹویٹر پوسٹ میں کہا، بد قسمتی سے، اس کیس سے تو یہ ظاہر ہوتا ہیکہ ڈنمارک کے خلاف دہشت گردی کا خطرہ اب بھی سنگین ہے۔ ڈنمارک کی انٹیلی جنس ایجنسی کا کہنا ہیکہ 6اور 8فروی کے دوران پولیس کے متعدد آپریشنز کے بعد حراست میں لیے گئے افراد میں سے 7 کو ‘سکیورٹی اینڈ انٹیلی جنس سروس’ (پی ای ٹی) نے مزید تفتیش کیلئے اپنی تحویل میں لے لیا ہے۔
