ممبئی۔ دنیا بھر میں پھیلی کورونا وائرس وباء کے علاج کیلئے ڈاکٹرس تحقیق میں مصروف ہیں، لیکن پلازما تھراپی کووڈ۔ 19 سے متاثر مریضوں کیلئے اُمید کی کرن نظر آرہی ہے۔اس سلسلے میں جماعت اسلامی ہند مہاراشٹر کووڈ۔ 19 میں مبتلا مریضوں کے علاج معالجے کے مقصد سے ریاست گیر سطح پر پلازما تھراپی کیلئے “ڈونیٹ پلازما ، ڈیفیٹ کورونا” کے نام سے 3 روزہ مہم شروع کی ہے ۔ اس مہم کا انعقاد 4 ، 5 اور6 اگست کو مہاراشٹرا بھر میں کیا جائے گا۔ کووڈ۔19 سے صحت یاب ہونے والے مریض رضاکارانہ طور پر پلازما کا عطیہ کریں گے اور اس مہم کو کامیاب بنانے کی کوشش کریں گے۔اس طریقہ کار کو convalescent
پلازما تھراپی
، passive immunisation
بھی کہا جاتا ہے۔ اس تھراپی میں کورونا سے متاثرہ مریض کے بیماری سے صحت یاب ہونے کے کچھ وقت بعد اس کے ڈونیٹ کئے ہوئے پلازما سے دیگر کورونا مریضوں کا علاج کیا جاتا ہے۔ ان ٹھیک ہوئے مریضوں کے پلازما میں کورونا وائرس کے انفیکشن کو ختم کرنے والے اینٹی باڈیز تیار ہوتے ہیں۔ دنیا کے بہت سے ممالک اس تھراپی کو اپنا رہے ہیں۔ ایک صدی قبل ایک طرح کے فلو کی وبا کی روک تھام اور ایبولا اور سارس وبائی بیماری سے متاثرہ افراد کا بھی اسی طریقہ سے علاج کیا جاچکا ہے۔ ہمارے ملک میں کووِڈ۔19 سے متاثرہ مریضوں کے اس تھراپی سے علاج معالجے کیلئے پلازمہ کی ضرورت پڑ رہی ہے۔ افسوس کی بات ہے کہ ہمارے ملک میں ہزاروں افراد اس وبائی بیماری سے متاثر ہوئے ہیں اور ہماری یہ خوش قسمتی ہے کہ ان میں سے اکثر وبیشتر افراد بیماری سے صحت یاب بھی ہوئے ہیں۔جماعت اسلامی ہند مہاراشٹر کے شعبہ خدمت خلق کے ذمہ دار مظہر فاروق نے کہا کہ کووڈ۔19 سے متاثرہ مریضوں کی خدمت اور علاج کی طرف بڑھے ہوئے اقدامات اللہ کے نزدیک بڑے اجر و ثواب کا ذریعہ ہیں۔ اسلام نے ضرورت مند انسانوں کیلئے مدد کرنے کو بہت اہمیت دی ہے۔ اللہ اس عمل کو پسند کرتا ہے کہ معاشرے کے ضرورت مند اور مستحق لوگوں کی مدد کریں جن کو اللہ نے اپنے فضل سے نوازا ہے۔ ان میں سے وہ بھائی بھی ہیں جن کو اللہ نے کورونا وائرس سے نجات عطا کی ہے۔
