جموں : جموں وکشمیر پردیش کانگریس نے چہارشنبہ کے روز یہاں مہا تما گاندھی پرتما چوک ستہ واری میں راہول گاندھی کی حمایت میں ایک روزہ خاموش ستیہ گرہ شروع کیا۔ستیہ گرہ میں پارٹی کے صدر وقار رسول وانی کے علاوہ کئی لیڈران و کارکنان نے حصہ لیا۔اس موقع پر وقار رسول وانی نے میڈیا کے ساتھ بات کرتے ہوئے کہا کہ راہل گاندھی کے خلاف سازش کی جا رہی ہے ۔انہوں نے کہا: ‘راہول جی کے خلاف سازش کی جا رہی ہے فرضی کیس لگا کر ان کو پھنسایا جا رہا ہے ان کو پارلیمنٹ سے بے دخل کیا گیا کیونکہ وہ غریبوں اور بے روز گار افراد کی آواز تھے ‘۔ان کا کہنا تھا کہ راہل جی نے غریبوں اور بے روزگار افراد کے لئے اور مہنگائی کے خلاف بھارت جوڑو یاترا نکالی تھی۔موصوف صدر نے دعویٰ کیا کہ راہول جی کی مقبولیت دیکھ کربی جے پی بوکھلا گئی لیکن کانگریس سڑکوں پر آکر لڑئی لڑے گی۔پارٹی کے سینئر لیڈر رمن بھلا نے بتایا کہ آج کا یہ خاموش ستیہ گرہ راہل جی کی حمایت میں رکھا گیا ہے ۔ انہوں نے کہاکہ: ‘راہول جی پارلیمنٹ کے باہر اور اندر لوگوں کی آواز بن کر سامنے آگئے اور بی جے پی ان کے سوالوں کے جواب دینے میں نا کام ہوگئی’۔