سرینگر، 30 اکتوبر (یو این آئی) جموں و کشمیر قانون ساز اسمبلی میں آج ہنگامہ دیکھنے میں آیا جب بی جے پی ارکان نے وقفہ سوالات میں خلل ڈالا جس کے بعد تین بی جے پی ارکان کو ایوان اسمبلی سے باہر نکال دیا گیا۔ وقفہ سوالات کے دوران بی جے پی اراکین نے حالیہ سیلاب پر بحث کا مطالبہ کیا۔ اس بات کی نشاندہی کرتے ہوئے کہ انہوں نے اس مسئلہ پر نئی تحریک التواء پیش کی ہے لیکن اسپیکر نے فیصلہ کیا کہ ایک بار مسترد ہونے کے بعد اسی معاملے پر تحریک التوا نہیں لائی جا سکتی ہے ۔ اپوزیشن لیڈر سنیل شرما نے حکومت پر سیلاب کی صورتحال پر بحث سے بچنے کا الزام لگایا۔ اپوزیشن لیڈر نے محکمہ عمارات و شوارع میں بدعنوانی کا الزام لگایا جس کے نتیجہ میں ایوان میں دونوں طرف سے نعرہ بازی ہوئی۔
