نئی دہلی: جموں و کشمیر میں علیحدگی پسند تنظیم حریت کانفرنس سے وابستہ ایک اور تنظیم جموں کشمیر ماس موومنٹ نے علیحدگی پسند نظریہ ترک کرکے ملک کے اتحاد کے تئیں اپنی یکجہتی کا اعلان کیا ہے۔ مرکزی وزیر داخلہ امیت شاہ نے آج سوشل میڈیا پلیٹ فارم ایکس پر یہ اطلاع دی۔ انہوں نے کہا کہ جموں کشمیر ماس موومنٹ کے اس فیصلے کے بعد مرکز کے زیر انتظام علاقے میں علیحدگی پسندی کو مسترد کرنے والی تنظیموں کی تعداد بڑھ کر 12 ہو گئی ہے ۔ امیت شاہ نے کہا کہ مودی حکومت کے تحت جموں و کشمیر میں اتحاد کا جذبہ غالب ہے ۔ حریت سے وابستہ ایک اور تنظیم جموں و کشمیر ماس موومنٹ نے علیحدگی پسندی کو مسترد کر دیا ہے۔
اور ہندوستان کے اتحاد سے اپنی مکمل وابستگی کا اعلان کیا ہے ۔ میں ان کے اس اقدام کا تہہ دل سے خیر مقدم کرتا ہوں۔ یہ وزیر اعظم نریندر مودی کے ایک بھارت شریشٹھ بھارت کے خواب کی جیت ہے ۔
قابل ذکر ہے کہ گزشتہ کچھ عرصے سے کئی علیحدگی پسند تنظیموں نے حریت کانفرنس سے اپنے تعلقات توڑ لیے ہیں۔
