جموں: نیشنل کا نفرنس کے معاون جنرل سکریٹری ڈاکٹر مصطفی کمال نے کہا ہیکہ موجودہ مرکزی سرکار نے جموں و کشمیر کو خصوصی پوزیشن سے محروم کرکے جمہوریت کا قتل کیا ہے۔ انہوں نے کہا کہ جب تک جموں وکشمیر میں دفعہ 370اور دفعہ 35اے کو بحال نہیں کیا جا ئے گا تب تک یہاں امن کی فضا قائم ہونا ناممکن ہے ۔مرکزی وزیر داخلہ امیت شاہ کے بیان کہ جموں وکشمیر میں امن قائم ہے ، کو جھوٹ قرار دیتے ہوئے ان کا کہنا تھا کہ کشمیر کو فوجی چھاؤنی اور نوآبادیاتی کالونی میں تبدیل کیا گیا ہے ۔موصوف معاون جنرل سکریٹری نے ان باتوں کا اظہار جمعرات کے روز یہاں شیر کشمیر بھون میں پارٹی عہدیداروں سے اپنے خطاب کے دوران کیا۔انہوں نے کہا ایک طرف ملک یوم جمہوریہ کی تقریبات منانے میں مصروف ہے جبکہ دوسری طرف جموں وکشمیر اور لداخ کے لوگوں کو جمہوری و آئینی حقوق سے محروم رکھا جارہا ہے ۔ ان کا کہنا تھا مودی سر کار نے جموں وکشمیر کو دفعہ 370اور دفعہ 35اے سے محروم کرکے جمہوریت کا قتل کیا ہے۔کمال نے کہا کہ آنجہانی ہری سنگھ نے جن تین شرائط پر ہندوستان کے ساتھ الحاق کیا تھا ان کو منسوخ کرنا آئین کی کھلم کھلا خلاف ورزی ہے ۔
