کولکتہ ۔چیف منسٹر ممتا بنرجی نے 74ویں یو م آزادی کے موقع پراپنے پیغام میں کہا ہے کہ ملک جن بنیادوں پر تعمیر کیا گیا ہے اس کی حفاظت کیلئے ہمیں ہر ممکن کوشش کرنی چاہیے ۔کورونا وائرس کے سایہ میں مغربی بنگال میں یوم آزادی کی تقریب کا انعقاد کیا گیا۔ممتا بنرجی کی قیادت میں کولکتہ کے ریڈ روڈ پر پرچم کشائی کی گئی مگر اس مرتبہ پروگرام کو بہت ہی مختصر کیا گیا تھا۔عام لوگوں کو شرکت کی اجازت نہیں تھی۔نصف گھنٹے میں ہی پوری تقریب کو ختم کردیا گیا۔اس موقع پر چند افسران اور سینئر وزرا موجود تھے ۔اس موقع پر ممتا بنرجی نے ریاست کے عوام کو یوم آزادی کی مبارک باد دی اور ان عظیم شخصیات کو خراج عقیدت پیش کیا جنہوں نے ملک کی آزادی کیلئے اپنی جانوں کی قربانی پیش کی تھی ۔ انہوں نے کہا کہ ہمیں آزادی کافی جدوجہد کے بعد حاصل ہوئی ہے اس لئے جن اصولوں اور بنیادوں پر ملک کی تعمیر کی گئی ہے اس کی بہر صورت ہمیں حفاظت کرنی چاہیے ۔اس موقع پر ممتا بنرجی نے کورونا کے خلاف جد وجہد کررہے ان 25فرنٹ لائن ورکروں کو اعزاز سے نوازا جو کورونا سے متاثر ہوئے اور اس کے بعد صحت یاب پر ڈیوٹی میں شمولیت اختیار کی۔اس تقریب کے موقع پر ممتا بنرجی کی کمپوز موسیقی کورونا ایک دن چلا جائے گاکورونا کو ہم ایک دن ہرادیں گے بیک گراونڈ میں بج رہا تھا۔اس موقع پر ماسک پہن کر محفوظ ڈرائیو اور محفوظ زندگی کا نعرہ لکھا ہوا تھا۔اس موقع پر ریاستی حکومت نے 5لاکھ افراد کے درمیان ماسک تقسیم کرنے کا فیصلہ کیا گیا ہے ۔اس سے قبل ممتا بنرجی نے شہریوں سے اپیل کی کہ یوم آزادی کے موقع پر تقریب منعقد کرتے وقت حکومت کے رہنماہدایات کی پاسداری ضرور کریں۔گورنر جگدیپ دھنکر بارک پور میں واقع مہاتما گاندھی گھاٹ جاکر پرچم کشائی کی اور انہوں نے کہا کہ جمہوری روایات و اقدار کی پاسداری بہر صورت کی جانی چاہیے ۔پرتشدد سیاست سے کنارہ کشی اختیارکرنا ہم سب کی ذمہ داری ہے ۔مغربی بنگال میں مختلف مقامات پر یوم آزادی کی تقریبات بہت ہی سادہ انداز میں منایا گیا ہے ۔گزشتہ سالوں میں یہاں بڑے پیمانے عطیہ کیمپ کا انعقاد کیا جاتا رہا ہے مگر اس مرتبہ بھیڑ بھاڑ والی تقریبات سے گریز کیا گیا ہے ۔بنگال میں یومیہ 3ہزار کورونا وائرس کے کیس آنے لگے ہیں۔
