نئی دہلی۔ 7 ڈسمبر (سیاست ڈاٹ کام) عوامی شعبہ کے ادارہ تیل و قدرتی گیاس کارپوریشن (او این جی سی) کے دو کھلاڑیوں نے نیپال کے صدر مقام کٹھمنڈو میں منعقدہ جنوبی ایشیائی کھیلوں میں ہندوستان کیلئے دو گولڈ میڈل جیت چکے ہیں۔ کرپال سنگھ اور سریش کمار کو اس ہفتہ دو گولڈ میڈلس حاصل ہوئے۔ اس کمپنی کے بیان میں کہا گیا ہے کہ ’’کرپال سنگھ نے ڈسکس تھرو میں ایک نئی تاریخ بنائی اور ایک نئے ریکارڈ کے ساتھ گولڈ میڈل جیت لیا۔ وہ ڈسکس تھرو میں ہندوستان کے قومی چمپین اور او این جی سی میں ایک افسر ہیں۔ سریش کمار کو مردوں کے 10 ہزار میٹر زمرے میں گولڈ میڈل حاصل ہوا ہے۔ قبل ازیں وہ رانچی میں منعقدہ قومی اوپن اتھیلیٹکس چمپین شپ میں بہترین کھیل کے مظاہرہ کے ساتھ قومی چمپین بن چکے تھے۔ او این جی سی کے بیان میں مزید کہا گیا ہے کہ یہ ادارہ کھیلوں کو بڑے پیمانے پر فروغ دیتا ہے جہاں قومی و بین الاقوامی درجہ کے 150 سے زائد کھلاڑی اور اتھیلیٹس برسرخدمت ہیں۔ او این جی سی نے 3 تا 5 ڈسمبر احمدآباد میں تیسرے پیرا گیمس کا اہتمام کیا تھا جس میں تیل اور عوامی شعبہ کے اداروں کے 220 پیرا اتھیلیٹس نے حصہ لیا تھا۔
