خرطوم: سوڈان کے جنوبی علاقہ میں زمین کی ملکیت کے تنازع پر ہونے والے جھگڑے میں 38 افراد ہلاک اور 52 زخمی ہوگئے۔ عالمی خبر رساں ادارے کے مطابق سوڈان کی ریاست لیکس کے رہائشی نوجوان کا جھگڑا ریاست وارپ کے چرواہوں سے ہوا جو اپنے مویشیوں کے ساتھ چراہ گاہ اور پانی کی تلاش میں کھیتوں میں داخل ہوگئے تھے۔جس پر تلخ کلامی کے بعد جھگڑا بڑھ گیا اور دونوں جانب سے کی جانے والی فائرنگ میں 38 افراد ہلاک اور 52 زخمی ہوگئے۔ رپورٹ کے مطابق ہلاک ہونے والوں میں لیکس ریاست کے 19 اور واراپ کے بھی 19 باشندے شامل ہیں جب کہ زخمیوں میں الیکس کے 19 اور واراپ کے 17 شہری شامل تھے۔یاد رہے کہ چار روز قبل بھی تیل کی دولت سے مالا مال علاقے میں پیدا ہونے والے زمینی تنازع پر 52 افراد ہلاک اور 64 سے زائد زخمی ہوگئے تھے۔ وارپ ریاست کے وزیر اطلاعات ولیم وول میوم نے بتایا کہ لڑائی ریاست لیکس اور وارپ کی سرحد پر الور کے علاقے میں ہوئی تاہم اب حالات کنٹرول میں ہیں۔یاد رہے کہ جنوبی سوڈان نے 39 سالہ جنگ کے بعد 2011 میں سوڈان سے آزادی حاصل کی تاہم 2013 سے 2018 تک ایک تباہ کن اندرونی تنازع میں ڈوبا رہا تھا اور اب بھی کئی علاقے میں مسلح جھڑپیں جاری ہیں۔