سری نگر، 21 جنوری (سیاست ڈاٹ کام) جنوبی کشمیر کے اونتی پورہ کے کھریو علاقہ میں منگل کی صبح ہونے والے ایک تصادم میں دو جنگجو مارے گئے _مہلوک جنگجوؤں کے بارے میں بتایا جارہا ہے کہ وہ جیش محمد نامی جنگجو تنظیم کے ساتھ وابستہ تھے _ ان میں سے ایک کی شناخت ترال کے رہنے والے رئیس احمد کے بطور ہوئی ہے _سرکاری ذرائع نے مسلح تصادم کی تفصیلات فراہم کرتے ہوئے کہا کہ اونتی پورہ کے کھریو میں جنگجوؤں کی موجودگی سے متعلق خفیہ اطلاع ملنے پر فوج، جموں وکشمیر پولیس اور سی آر پی ایف نے مذکورہ علاقہ کو منگل کی علی الصبح محاصرے میں لے لیا_انہوں نے کہا کہ تلاشی آپریشن کے دوران علاقہ میں موجود جنگجو[؟]ں نے فورسز پر فائرنگ کی اور جوابی فائرنگ میں دو جنگجو مارے گئے _انہوں نے مزید کہا کہ علاقہ میں آپریشن جاری ہے اور مارے گئے جنگجوؤں کی شناخت معلوم کی جارہی ہے _قبل ازیں جنوبی ضلع شوپیاں کے وچی علاقہ میں پیر کو ہونے والے ایک تصادم میں حزب المجاہدین سے وابستہ تین جنگجو مارے گئے _مہلوک جنگجوؤں میں ایس پی او سے جنگجو بننے والا عادل بشیر بھی شامل تھا جس نے 2018 میں اس وقت کے پی ڈی پی ممبر اسمبلی اعجاز احمد میر کی سرکاری رہائش گاہ سے سات اے کے 47 رائفلیں اور ایک پستول کو اڑایا تھا_
