نئی دہلی ۔20؍ستمبر ( ایجنسیز)ہندوستانی سنیما کے سب سے بڑے اعزاز ’داداصاحب پھالکے ایوارڈ 2023‘ کا آج اعلان کر دیا گیا۔ 2023 کیلئے یہ ایوارڈ جنوبی ہند کے معروف سوپراسٹار موہن لال کو دیا جائے گا۔ اداکار کو یہ اعزاز ہندوستانی سنیما میں ان کے تعاون کیلئے دیا جار ہا ہے۔ اس سلسلے میں مرکزی وزارت برائے اطلاعات و نشریات نے سوشل میڈیا پلیٹ فارم ’ایکس‘ پر ایک پوسٹ کے ذریعہ جانکاری دی اور لکھا ہے کہ داداصاحب پھالکے ایوارڈ سے متعلق سلیکشن کمیٹی کی سفارش پر حکومت ہند کو یہ اعلان کرتے ہوئے خوشی ہو رہی ہے کہ موہن لال کو داداصاحب پھالکے ایوارڈ 2023 سے نوازا جائے گا۔ یہ ایوارڈ 23 ستمبر 2025 کو 71ویں نیشنل فلم ایوارڈ کی تقریب میں دیا جائے گا۔موہن لال کو ’داداصاحب پھالکے ایوارڈ‘ دیے جانے کے اعلان پر مرکزی وزیر ریل اشونی ویشنو نے بے حد خوشی کا اظہار کیا اور موہن لال کو مبارکباد پیش کی ۔ انہوں نے لکھا ہے کہ کیرالہ کی خوبصورت زمین آدیپولی سے لے کر دنیا بھر کے ناظرین تک ان کے کام نے ہماری ثقافت کا جشن منایا ہے اور ہماری امیدوں کو بڑھایا ہے۔ ان کی وراثت ہندوستان کے تخلیقی جذبہ کو متاثر کرتی رہے گی۔
