ماسکو : روسی شاعروں کو یوکرین جنگ کے خلاف اشعار پڑھنے پر طویل عمر قید کی سزا سنادی گئی۔ غیرملکی میڈیا کے مطابق روس کے دارالحکومت ماسکو کی ایک عدالت نے دو روسی مردوں کو گزشتہ سال یوکرین میں جنگ کے خلاف اشعار پڑھنے کے جرم میں سزا سنائی. رپورٹس کے مطابق 33 سالہ آرتیوم کمارڈین کو سات سال اور 23 سالہ یگور شتوبا کو ساڑھے 5 سال قید کی سزا سنائی گئی۔ غیرملکی میڈیا کے مطابق دونوں افراد کو قومی سلامتی کو نقصان پہنچانے اور نفرت کو ہوا دینے کے جرم میں سزا سنائی گئی۔ غیرملکی میڈیا کے مطابق روس میں یوکرین جنگ سے اختلاف رائے کے خلاف کریک ڈاؤن بھی جاری ہے۔
افغانستان کے خصوصی نمائندہ پر قرارداد منظور
نیویارک : اقوام متحدہ کے نمائندہ خصوصی برائے افغانستان کی تقرری کیلئے سلامتی کونسل میں قرارداد منظور کرلی گئی۔ قرارداد کی حمایت میں سلامتی کونسل کے 13 ارکان نے ووٹ دیا، چین اور روس رائے شماری کے وقت اجلاس سے غیر حاضر رہے۔ افغانستان کیلئے یو این کے نمائندہ خصوصی کی تقرری کا مقصد طالبان رہنماؤں سے رابطے بڑھانا ہے۔ یو این سیکریٹری جنرل سے افغانستان کیلئے خصوصی نمائندے کی تقرری کا مطالبہ کیا گیا تھا۔
