کراچی۔7 مارچ (سیاست ڈاٹ کام ) پی ایس ایل کی فرنچائز ملتان سلطانز کی جانب سے رواں سیزن کے دوران عمدہ کارکردگی سے محرومی کے باوجود بائیں ہاتھ کے فاسٹ بولر جنید خان مناسب مواقع ملنے پراپنی اہلیت ثابت کرنے کیلئے تیار ہیں ۔ انہوں نے کہا ہیکہ اگر انہیں پاکستانی ٹیم کی نمائندگی کا موقع مل جائے تو انکی حقیقی کارکردگی سامنے آسکتی ہے۔ حالیہ میچوں میں ان سے بہت اچھی بولنگ نہیں ہو سکی اور وہ چھ میچوں میں آٹھ وکٹیں ہی لے سکے لیکن وہ درست راہ کی جانب گامزن ہیں اور انہوں نے ٹیم میں واپسی پر نظریں جما رکھی ہیں جس کیلئے وہ گزشتہ برس نومبر کے بعد سے نہیں کھیل سکے ہیں۔ پی ایس ایل سے قبل بنگلہ دیش پریمیئر لیگ میں کھلنا ٹائٹنز کی جانب سے 11وکٹیں حاصل کرنے والے جنید خان نے کہا کہ ان میں بہتری آ رہی ہے اور اگر انہیں آسٹریلیا اور انگلینڈ کیخلاف کھیلنے کا موقع مل جائے تو وہ ورلڈ کپ سکواڈ میں جگہ بنا سکتے ہیں۔
