انتخابی مہم کا جائزہ ، بوگس سروے رپورٹس کا شکار نہ ہونے کا مشورہ ، بوتھ سطح پر وزراء کو ذمہ داریاں
حیدرآباد : 2 نومبر ( سیاست نیوز) چیف منسٹر ریونت ریڈی نے جوبلی ہلز اسمبلی حلقہ کے ضمنی چناؤ میںکانگریس کی کامیابی کو یقینی بنانے کیلئے انتخابی حکمت عملی کا جائزہ لیا ۔ چیف منسٹر نے صدر پردیش کانگریس مہیش کمار گوڑ ، ریاستی وزراء پی سرینواس ریڈی ، پونم پربھاکر ، ٹی ناگیشور راؤ ، جی ویویک وینکٹ سوامی ، اے آئی سی سی سکریٹری وشواناتھن اور جوبلی ہلز کی انتخابی مہم میں شامل قائدین کے ساتھ اجلاس منعقد کیا ۔ چیف منسٹر کی قیامگاہ پر اجلاس میں انتخابی مہم اور ووٹرس کے رجحان کا جائزہ لیا گیا ۔ چیف منسٹر نے بی آر ایس کے قریبی حلقوں سے جاری کی جانے والی سروے رپورٹ پر سخت ردعمل ظاہر کیا اور قائدین سے کہا کہ وہ گمراہ کن سروے رپورٹس کا شکار نہ ہوں ۔ چیف منسٹر نے کہا کہ بنیادی سطح پر کانگریس کا موقف مستحکم ہے اور عوام میں الجھن پیدا کرنے فرضی رپورٹس جاری کی جارہی ہیں ۔ چیف منسٹر نے کہا کہ انتخابی مہم میں عوام کے جوش و خروش سے پتہ چلتا ہے کہ نوین یادو کی کامیابی یقینی ہے ۔ چیف منسٹر نے قائدین سے کہا کہ وہ اپنی ذمہ داریوں کی تکمیل میں کوئی کوتاہی نہ کریں اور بوتھ سطح کی کمیٹیوں کی متحرک کیا جائے ۔ چیف منسٹر نے وزراء سے کہا کہ وہ انتخابی مہم کے اختتام پر اپنے الاٹ کردہ ڈیویژنس پر توجہ مرکوز کریں ۔ انچارج ، وزراء کے ساتھ لنچ میٹنگ میں ریونت ریڈی نے مختلف سروے رپورٹس کا حوالہ دیا ۔ انہوں نے کہاکہ دو دن میں روڈ شو کے دوران انہوں نے عوام میں کانگریس کے حق میں غیر معمولی لہر دیکھی ہے ۔ چیف منسٹر نے کہا کہ بی آر یس سے جاری کردہ ’کے کے سروے ‘ سے گمراہ ہونے کی ضرورت نہیں ہے شکست کے خوف سے بوکھلاہٹ کا شکار ہوکر بوگس سروے جاری کیا گیا ۔ انہوں نے کہا کہ تمام بلدی ڈیویژنس میں کانگریس کا موقف مستحکم ہے ۔ اجلاس میں وزراء نے انتخابی مہم میں عوامی ردعمل سے واقف کرایا ۔ بتایا جاتاہے کہ بعض وزراء نے انتخابی وعدوں کی تکمیل کے بارے میں عوامی سوالات سے واقف کرایا ۔ چیف منسٹر نے وزراء اور قائدین سے کہا کہ وہ حکومت کی فلاحی اسکیمات وعدوں کی تکمیل کے بارے میں عوام کو واقف کرائیں ۔ انتخابی مہم میں شامل ہر شخص کی ذمہ داری ہے کہ وہ پارٹی کی کامیابی کو اولین ترجیح دیں ۔ انہوں نے اپوزیشن کی جانب سے انتخابی ضابطہ اخلاق کی خلاف ورزی پر نظر رکھنے کا مشورہ دیا ۔ اجلاس میں وزراء نے اس یقین کا اظہار کیا کہ آئندہ ایک ہفتہ کی انتخابی مہم سے صورتحال کانگریس کے حق میں مزید مستحکم ہوگی ۔ چیف منسٹر نے بوتھ سطح پر رائے دہی فیصد میں اضافہ کا مشورہ دیا تاکہ کانگریس امیدوار کی کامیابی زائد ووٹوں سے ہوسکے ۔ صدر پردیش کانگریس مہیش کمار گوڑ نے پارٹی مبصرین کی رپورٹ سے اجلاس کو واقف کرایا ۔ 1
