یوسف گوڑہ ڈیویژن میں گھر گھر مہم ، بی آر ایس قائدین کی تنقید مسترد
حیدرآباد ۔ 27 ۔ اکتوبر (سیاست نیوز) وزیر ٹرانسپورٹ پونم پربھاکر نے آج منسٹرس کوارٹرس میں اپنی قیامگاہ پر پارٹی قائدین کا اجلاس منعقد کیا جس میں جوبلی ہلز کے یوسف گوڑہ ڈیویژن سے تعلق رکھنے والے سرکردہ قائدین نے شرکت کی۔ اجلاس میں چیف منسٹر کے مشیر وی نریندر ریڈی ، ارکان اسمبلی نارائن ریڈی ، لکشما ریڈی ، جئے ویر ریڈی ، بی نائک ، صدرنشین اسپورٹس اتھاریٹی شیوا سینا ریڈی ، صدرنشین حج کمیٹی مولانا سید غلام افضل بیابانی خسرو پاشاہ اور دیگر قائدین نے شرکت کی ۔ اجلاس میں جوبلی ہلز کے انتخابی مہم کا جائزہ لیتے ہوئے مہم میں شدت پیدا کرنے کا فیصلہ کیا گیا۔ پونم پربھاکر نے کہا کہ رائے دہندوں سے گھر گھر پہنچ کر ملاقات کرتے ہوئے حکومت کی فلاحی اسکیمات سے واقف کرایا جائے۔ پارٹی کے مقامی کیڈر کو متحرک کیا جانا چاہئے۔ اجلاس میں طئے کیا گیا کہ ہر 100 رائے دہندوں پر ایک انچارج مقرر کرتے ہوئے رائے دہی کے موقع پر فیصد میں اضافہ کے اقدامات کئے جائیں ۔ رائے دہندوں کو بوتھ تک پہنچانے اور واپسی کو یقینی بنایا جائے تاکہ جوبلی ہلز میں رائے دہی کا فیصد بہتر ہو۔ قائدین نے بتایا کہ یوسف گوڑہ ڈیویژن میں پارٹی کا موقف مستحکم ہے اور چیف منسٹر کے روڈ شو کے بعد صورتحال مزید بہتر ہوگی۔ بعد میں میڈیا سے بات چیت کرتے ہوئے پونم پربھاکر نے بی آر ایس قائد ہریش راؤ پر کابینہ کے اجلاس کے بارے میں بے بنیاد الزام تراشی کے لئے تنقید کا نشانہ بنایا۔ انہوں نے کہا کہ ہریش راؤ ، وزراء اور چیف منسٹر کے بارے میں گمراہ کن بیانات دے رہے ہیں۔ انہوں نے کہا کہ ہریش راؤ عوام کی توجہ حقیقی مسائل سے ہٹانا چاہتے ہیں۔ جوبلی ہلز کی انتخابی مہم میں راہول گاندھی کو نشانہ بنانے کی کوشش افسوسناک ہے۔1
