ریونت ریڈی کی قائدین سے مشاورت، کیڈر کو متحرک کرتے ہوئے زائد ڈیویژنس پر کامیابی کا نشانہ
حیدرآباد۔ 16 نومبر (سیاست نیوز) جوبلی ہلز ضمنی چناؤ میں بھاری اکثریت سے کامیابی کے بعد کانگریس پارٹی نے گریٹر حیدرآباد میونسپل کارپوریشن کے انتخابات پر توجہ مرکوز کردی ہے۔ چیف منسٹر ریونت ریڈی نے جی ایچ ایم سی انتخابات کی حکمت عملی پر قائدین سے مشاورت کی۔ واضح رہے کہ اسمبلی انتخابات میں گریٹر حیدرآباد کی ایک بھی نشست پر کانگریس کو کامیابی حاصل نہیں ہوئی۔ گزشتہ جی ایچ ایم سی انتخابات میں کانگریس کا مظاہرہ مایوس کن رہا۔ گریٹر حیدرآباد میں پارٹی کے کمزور موقف کے باوجود مقامی جماعت کی تائید سے جوبلی ہلز میں کانگریس کے امیدوار نوین یادو کو کامیابی حاصل ہوئی ہے۔ بتایا جاتا ہے کہ چیف منسٹر ریونت ریڈی نے جی ایچ ایم سی چناؤ میں مقامی جماعت کے ساتھ مفاہمت کی تجویز پیش کی ہے تاکہ بلدیہ کے اقتدار پر متحدہ طور پر قبضہ کیا جاسکے۔ گریٹر حدود میں پارٹی کیڈر کو متحرک کرتے ہوئے تنظیمی سطح پر کانگریس کو مستحکم کرنے کی تیاریاں ہیں۔ گریٹر حیدرآباد میونسپل کارپوریشن کی منتخبہ باڈی کی میعاد 10 فروری 2026 کو ختم ہو رہی ہے اور ڈسمبر سے انتخابی ماحول تیز ہوسکتا ہے۔ ایسے میں کانگریس پارٹی جی ایچ ایم سی انتخابات میں بہتر مظاہرہ کی کوشش کررہی ہے تاکہ حکومت کی 2 سالہ کارکردگی کو عوامی تائید تصور کی جاسکے۔ جوبلی ہلز ضمنی چناؤ میں کامیابی کے بعد چیف منسٹر ریونت ریڈی کا موقف مستحکم ہوا ہے اور وہ جی ایچ ایم سی پر بھی پارٹی پرچم لہرانے کی منصوبہ بندی کررہے ہیں۔ گزشتہ جی ایچ ایم سی انتخابات میں جو ڈسمبر 2020 کو منعقد ہوئے تھے کانگریس کو محض 2 نشستوں پر کامیابی حاصل ہوئی تھی۔ بی آر ایس نے 56، بی جے پی 48 اور مجلس کو 44 بلدی ڈیویژنس میں کامیابی حاصل ہوئی تھی۔ 2016 کے بلدی انتخابات میں بھی کانگریس کو صرف 2 نشستیں حاصل ہوئی تھیں جبکہ بی آر ایس 99 اور مجلس کو 44 نشستیں حاصل ہوئی تھیں۔ بی جے پی کو 4 اور تلگودیشم کو ایک ڈیویژن میں کامیابی حاصل ہوئی تھی۔ کانگریس پارٹی چاہتی ہے کہ بی آر ایس اور بی جے پی کے حلقہ جات میں پارٹی کیڈر کو مستحکم کرتے ہوئے مجموعی طور پر بہتر مظاہرہ کیا جاسکے۔ بتایا جاتا ہے کہ چیف منسٹر ریونت ریڈی نے صدر پردیش کانگریس مہیش کمار گوڑ کو جی ایچ ایم سی کی انتخابی حکمت عملی طے کرنے کے لئے گریٹر حیدرآباد پارٹی قائدین کا اجلاس طلب کرنے کا مشورہ دیا ہے۔ حکومت کی 2 سال کی مدت میں کانگریس کو 2 اسمبلی حلقہ جات کے ضمنی چناؤ میں کامیابی حاصل ہوئی ہے۔ کامیابی کے تسلسل کو گریٹر حیدرآباد میں بھی جاری رکھنا چیف منسٹر کی اولین ترجیح ہے۔ 1
