خاتون زخمی، متصل جھونپڑیاں جلکر خاکستر، پولیس مصروف تحقیقات
حیدرآباد 10 نومبر (سیاست نیوز) حیدرآباد کے علاقہ جوبلی ہلز روڈ نمبر 1 پر واقع ’’اسپائس کچن ریسٹورنٹ‘‘ میں اتوار کی ابتدائی ساعتوں میں ایک زوردار دھماکہ ہوا۔ تفصیلات کے مطابق ریسٹورنٹ میں ریفریجریٹر کا کمپریشر زوردار دھماکہ کے ساتھ پھٹ پڑا جس کی وجہ سے ہوٹل میں بڑے پیمانے پر تباہی ہوئی اور ہوٹل کی دیوار ٹوٹ کر اس کا ملبہ قریب میں واقع جھونپڑیوں پر گر پڑا۔ جس کے باعث ایک خاتون زخمی ہوگئی اور کئی جھونپڑیاں تباہ ہوگئیں۔ دھماکہ اتنا زوردار تھا کہ اس کی آواز اطراف و اکناف کے علاقوں تک سنی گئی جس کی وجہ سے پورے علاقہ میں کچھ دیر کے لئے دہشت پیدا ہوگئی تھی۔ خیریت آباد رکن اسمبلی ڈی ناگیندر اور ڈی سی پی وجئے کمار نے ہوٹل کا معائنہ کیا اور مالکین سے ملاقات کرکے تفصیلات حاصل کیں۔ ہوٹل انتظامیہ نے میڈیا کو ہوٹل میں داخل ہونے سے روک دیا۔ دھماکہ کی وجہ سے برقی کھمبوں کو بھی نقصان پہنچا اور برقی سربراہی بھی متاثر ہوئی۔ ہوٹل میں مالی نقصان کا ابھی تک پتہ نہیں چلا۔ پولیس نے مقدمہ درج کرتے ہوئے تحقیقات شروع کردی۔ (ش)
