بی آر ایس قائدین کی کانگریس میں شمولیت کے بعد مہیش کمار گوڑ کا خطاب
حیدرآباد ۔ 16 ۔ اکتوبر (سیاست نیوز) صدر تلنگانہ پردیش کانگریس کمیٹی مہیش کمار گوڑ نے کہا کہ اسمبلی حلقہ جوبلی ہلز میں کانگریس پارٹی کی کامیابی یقینی ہے ۔ بی آر ایس اور بی جے پی صرف اپنے وجود کا مظاہرہ کرنے کیلئے انتخابی میدان میں ہیں۔ یہ ضمنی انتخاب کانگریس کی دو سالہ بہترین کارکردگی اور بی آر ایس کی 10 سالہ پسماندگی کے خلاف ہے۔ عوام کو فیصلہ کرنا ہے کہ انہیں ترقی چاہئے یا پسماندگی ؟ بی آر ایس کی خاتون قائدین کی کانگریس میں شمولیت کے موقع پر خطاب کرتے ہوئے مہیش کمار گوڑ نے کہا کہ چیف منسٹر ریونت ریڈی اسمبلی انتخابات میں کانگریس کے انتخابی منشور سے جو وعدے کئے گئے تھے، ان وعدوں کو پورا کرنے کے معاملہ میں غیر معمولی رول ادا کر رہے ہیں۔ وعدہ کے مطابق 40 لاکھ نئے راشن کارڈس جاری کئے گئے ہیں، خواتین کو آر ٹی سی بسوں میں مفت سفر کی سہولت فراہم کی گئی ہے۔ 200 یونٹ تک مکانات کو مفت برقی سربراہ کی جارہی ہے۔ 500 روپئے میں گیس سلینڈر فراہم کیا جارہا ہے ۔ حکومت کی کارکردگی سے سماج کے تمام طبقات مطمئن ہیں۔ بی آر ایس اور بی جے پی ایک منظم سازش کے تحت کانگریس کو بدنام کرنے کیلئے حکومت کے خلاف جھوٹے بے بنیاد الزامات عائد کر رہے ہیں۔ جوبلی ہلز عوام کی ذمہ داری ہے کہ وہ کانگریس کے امیدوار نوین یادو کو بھاری اکثریت سے کامیاب بناتے ہوئے حکومت کو تنقید کا نشانہ بنانے والے بی آر ایس اور بی جے پی کو سبق سکھائیں۔ انہوں نے کہا کہ اسمبلی حلقہ جوبلی ہلز میں 85 فیصد غریب عوام ان کی ترقی اور بہبود کے معاملہ میں حکومت کی جانب سے بڑے پیمانہ پر اقدامات کئے جارہے ہیں ۔ راہول گاندھی کی خواہش کے مطابق چیف منسٹر ریونت ریڈی نے تلنگانہ میں ذات پات کا سروے کرایا ہے ۔ انہیں یقین ہے کہ نوین یادو 50000 کی اکثریت سے کامیابی حاصل کریں گے ۔ اس اجلاس میں اے آئی سی سی انچارج میناکشی نٹراجن ، ریاستی وزراء پونم پربھاکر، جی ویویک، ٹی ناگیشور راؤ کے علاوہ دوسرے قائدین بھی موجود تھے۔2
