اسلام آباد ۔28 فروری (سیاست ڈاٹ کام ) پاکستان سوپر لیگ میں کمنٹری کے فرائض انجام دے رہے جنوبی افریقی سابق فیلڈر جونٹی رہوڈز نے اسلام آباد میں ہیوی بائیک پر شہر کی سیر کی۔ دنیا بھر میں اپنی فیلڈنگ کے لیے مشہور سابق جنوبی افریقی کرکٹر ان دنوں پاکستان سوپر لیگ میں کمنٹری کے فرائض انجام دینے کے لیے پاکستان میں موجود ہیں۔ جونٹی رہوڈز نے ہیوی بائیک کے قافلے کے ہمراہ اسلام آباد کی سیر کی اور اس سفر کو شاندار قرار دیا۔انہوں نے کہا کہ جن دنوں میں کرکٹ کھیل رہا تھا تو اس وقت جن ملکوں کا میں نے دورہ کیا انہیں مجھے زیادہ دیکھنے کا موقع نہیں ملا تھا۔ماضی کے بہترین فیلڈر نے کہا کہ اب کوچ اورکمنٹیٹر کی حیثیت سے میری کوشش ہے کہ زیادہ سے زیادہ اس تجربے سے لطف اندوز ہو سکوں۔انہوں نے سماجی رابطوں کی ویب سائٹ ٹوئٹر پر ایک اور پیغام میں کہا کہ راولپنڈی کے میدان میں آخری بار ساتھی کمنٹیٹر ڈومینک کارک کے خلاف 1996 کے ورلڈ کپ کے دوران کھیلا تھا۔انہوں نے کہا کہ ہمارے ایک اور ساتھی کمنٹیٹر مائیکل سلیٹر راولپنڈی میں مین آف دی میچ ایوارڈ بھی جیت چکے ہیں۔ یاد رہے کہ جونٹی رہوڈز کے ساتھ انگلینڈ کے ڈومینک کارک، آسٹریلیا کے مائیکل سلیٹر سمیت متعدد سابق کرکٹ سوپر اسٹار پی ایس ایل میں کمنٹری کے لیے پاکستان میں موجود ہیں۔
