یلاریڈی منڈل کے دیہات کی غریب لڑکی دو سرکاری ملازمت حاصل کرنے میں کامیاب
یلاریڈی ۔ 17؍نومبر (سیاست ڈسٹرکٹ نیوز)۔ یلاریڈی منڈل کے قریبی دیہات سفدل پور علاقہ کے غریب خاندان سے تعلق رکھنے والی سریشا نامی لڑکی نے ان دنوں دو سرکاری ملازمتیں حاصل کرتے ہوئے یہ ثابت کردیا کہ قابلیت کیلئے مقام کوئی معنی نہیں رکھتا صرف عزم کی ضرورت ہوتی ہے۔ تفصیلات کے مطابق سفدل پور کے سدھاکر اور نرملا کی بیٹی سریشا نے کہا کہ بجپن سے ماں باپ کو محنت و مزدوری کا کام کرتا دیکھ کر یہ عزم کیا تھا کہ ایک نہ ایک دن سرکاری ملازمت حاصل کرکے دم لونگی۔ ماں باپ نے محنت مزدوری کرکے پڑھایا ہے تو پھر ذوق و محنت کیساتھ امتحانات کی تیاری کرکے سریشا نے پہلے لیڈی کانسٹبل کی ملازمت حاصل کی تھی اور اب گروپ چہارم کا امتحان کامیاب کرتے جونیر اسسٹنٹ کی ملازمت حاصل کی ہے جس پر ماں باپ کیساتھ ساتھ سفدل پور کی تمام لوگوں نے خوشی کا اظہار کیا۔ صحیح ہیکہ عزم قوی ہوتو کوئی کام مشکل نہیں۔
