حیدرآباد 9 جون ( یو این آئی ) آندھرا پردیش میں پہلی مرتبہ پانچ نائب وزرائے اعلی کو کابینہ میں شامل کیا گیا ہے ۔ وزیر اعلی وائی ایس جگن موہن ریڈی نے 25 وزرا کو اپنی کابینہ میں شامل کیا ہے ان میں پانچ نئے نائب وزرائے اعلی شامل ہیں ۔ ایس سی، ایس ٹی، بی سی، اقلیتی اور کاپو طبقات سے تعلق رکھنے والوں کونائب وزرائے اعلی بنایا گیا ہے ۔ ان کے پروفائل اس طرح ہیں ۔ پی سبھاش چندر بوس:ان کو نائب وزیر اعلی کے ساتھ ساتھ ریونیو، رجسٹریشن اینڈ اسٹامپس کی بھی ذمہ داری دی گئی ہے ۔ اسمبلی انتخابات میں ان کو دس ہزار چھ سو ووٹوں سے شکست ہوئی تھی۔ ان کو تلگودیشم کے وی جوگیشور راونے شکست دی تھی۔ مسٹر بوس راج شیکھر ریڈی کی کابینہ میں دو مرتبہ وزیر رہ چکے ہیں اور ایک مرتبہ روشیا کی کابینہ میں بھی انہوں نے وزیر کے طور پر خدمات انجام دی تھیں۔ دوسری نائب وزیر اعلی سری وانی ہیں۔انہیں کروپم ایس ٹی حلقے سے کامیابی ملی تھی۔ نائب وزیر اعلی کے ساتھ ساتھ ان کو قبائلی بہبود کا قلمدان بھی دیا گیا ہے ۔جگن کی کابینہ میں وہ واحد خاتون نایب وزیر اعلی ہیں۔ ان کا تعلق مغربی گوداوری ضلع سے ہے ۔ سیاست میں داخلے سے قبل وہ ٹیچر تھیں ۔ تیسرے نائب وزیر اعلی کے سرینواس ہیں ۔ انہوں نے تلگودیشم کے امیدوار کے راما را ؤ کو شکست دی تھی تھی وہ ایلورو اسمبلی حلقے سے منتخب ہوئے تھے ۔ ان کو صحت ،خاندانی بہبود اور طبی تعلیم کا بھی قلمدان دیا گیا ہے ۔ ایک اور نائب وزیراعلیٰ ناراینا سوامی ہیں جو گنگادھر نیلور کے اسمبلی حلقہ سے تلگودیشم کے امیدوار ہری کرشنا کے خلاف مقابلہ کرتے ہوئے کامیاب ہوئے تھے ۔ان کو بھی نائب وزیر اعلی بنانے کے ساتھ ساتھ آبکاری اور کمرشل ٹیکسز کا قلمدان دیا گیا ہے ۔ جگن کی کابینہ کے پانچویں نائب وزیراعلی عظمت باشاہ ہیں جنہوں نے کڑپہ اسمبلی حلقہ سے تلگودیشم کے امیدوار امیر بابو کے خلاف اسمبلی انتخابات میں کامیابی حاصل کی تھی ۔جگن کی کابینہ میں وہ وزیر اقلیتی امور بھی ہونگے ۔ باشاہ چھٹی مرتبہ پارٹی کے ٹکٹ پر مسلسل کڑپہ حلقہ سے منتخب ہوتے آئے ہیں۔