رانچی۔ سخت سکیورٹی کے درمیان جھارکھنڈ کے ضلع دیو گھر کے مادھو پور اسمبلی میں ضمنی انتخاب کے لئے ہفتہ کی صبح سات بجے سے پولنگ پر امن طور پر جاری ہے ۔ دیوگھر کے ڈسٹرکٹ الیکشن آفیسراورڈپٹی کمشنر منجوناتھ بھجنتری نے یہاں بتایا کہ آج صبح سات بجے سے 4877 پولنگ اسٹیشنوں پر پولنگ پر امن طور پر شروع ہوگئی ہے ۔ تمام پولنگ اسٹیشنوں پر صد فیصد ماسک استعمال کیے جارہے ہیں۔ صبح نو بجے تک ، 10.04 فیصد رائے دہندگان نے اپنا حق رائے دہی استعمال کیا۔ ڈسٹرکٹ الیکشن آفیسر نے متعدد ویب کاسٹنگ سنٹرز کا معائنہ کیا ہے اور وہاں تعینات افسران اور اہلکاروں کو ضروری اور مناسب ہدایات دیں۔ انہوں نے کووڈ ضابطوں پر صد فیصد عمل کے لئے ماسک، معاشرتی فاصلے اور سینیٹائزر کا استعمال کرتے رہنے کی بات کہی۔ عہدیدار نے بتایا کہ مدھو پور اسمبلی حلقہ میں کل (50 فیصد پولنگ اسٹیشنوں) 245 بوتھوں پر ویب کاسٹنگ کی سہولت کو یقینی بنایا گیا ہے ۔ کمیشن کے سینئر افسران پولنگ اسٹیشن کی پوری صورتحال پر بھی نظر رکھے ہوئے ہیں۔ کلکٹریٹ میں جدید سہولیات سے آراستہ ایک ویب کاسٹنگ کنٹرول روم قائم کیا گیا ہے ۔ جہاں بڑی اسکرین پر ویب کاسٹنگ ٹیمیں ہر بوتھ کی سرگرمی پر نگاہ رکھے ہوئے ہیں۔ مسٹر بھجنتری نے مدھو پور اسمبلی حلقہ کے تمام ووٹروں سے ماسک کے ساتھ صد فیصد اپنے حق رائے دہی کا استعمال کرنے کی اپیل کی ہے ۔
